Monday, January 24, 2011

मौलिक अधिकारया विषय अन्तरक्रिया


POSTED ON THU JAN 20, 2011 10:17 PM NST

पोहेंला थ्व त्रयोदशि कुन्हु संवैधानिक संवाद केन्द्र वानेश्वरया ग्वसालय् नोर्डिक (NORDIC), थीथी देय्या सभासदत व नेपाःया सभासदपिं दथुइ छगू अन्तरक्रिया ज्याझ्वः क्वचाल । उगु ज्याझ्वलय् नेवाः देय् दबूपाखें मूछ्याञ्जे रजनी महर्जनं ब्वति कया दीगु खः । 

अन्तरक्रिया ज्याझ्वलय् नर्वे, डेन्मार्क या सभासदिपं तथा यु.एन.डि.पि नर्वे या निर्देशकिपं लगायत थीथी डेलिगेटपिं झाःगु खः । नेपाः पाखें सभासदिपं राधेश्याम अधिकारी, आङदावा शेर्पा, लक्की शेर्पा, हरि फुयाल, सुरेन्द्र पाण्डे लगायतं ब्वति कयादीगु खः । 

नागरिक समाजया श्याम श्रेष्ठ, बालकृष्ण मावुहाङ व यु.एन.डि.पि पाखें कृष्ण खनाल व किथ लिस्लीपिंसं ब्वति कया दीगु । उगु ज्याझ्वलय् नेपाःया संविधान निर्माण प्रक्रियाया प्रगति विवरण पेश यायेगु तथा नर्वे व डेन्मार्क या संविधानय् अल्पसंख्यक वा भाषिक अधिकार नापं थी थी मौलिक अधिकारया विषयसं न्यनेकनै यायेगु ज्या जुगू खः ।

संवैधानिक निकाययात राय सुझाव लःल्हायेगु ज्याझ्वः


POSTED ON THU JAN 20, 2011 9:54 PM NST

पोहेंला थ्व पञ्चमि कुन्हु सहभागीतात्मक संविधान निर्माण प्रकिया(SPCAB-UNDP) या ग्वहालिइ नेवाः देय् दबू लगायत नेपाल तामाङ घेदुङ्ग, नेपाल मगर संघ, किराँत खमू यायोक्खा, नेपालकिराँत याक्थुङ चुंलुङ नापं थी थी संघसंस्था याना १८ गू नागरिक संस्थाया ग्वसालय् (SPCAB-UNDP) या परियोजनां न्याकूगु गा.वि.स.व निर्वाचन क्षत्रिय जन वकालत व नागरिक शिक्षा अभियान ज्याझ्वलय् मुंकाः हःगु राय सुझावयात छथाय् मुंकालि संवैधानिक निकायया सभापति माननिय निलम्बर आचार्ययात लःल्हायेगु ज्या क्वचाल । 

नेवाः देय् दबूया न्वकू धर्मशोभा तुलाधर व मूछ्याञ्जे रजनी महर्जनिपं लगायत थी थी मेगु संस्था उगु लिच्वः सभासद आचार्ययात उगु प्रतिवेदन लः ल्हानादीगु खः । ८६ सभासदपिंसं ब्वति कयादीगु उगु ज्याझ्वलय् सभासदत हिसिला यमि, रमेश लेखक, अनिल झापिसं उगु नागरिक शिक्षा वा राय सुझाव मुनेगु ज्या व सभासद व जनता दथुइ मुगू संवाद ज्या खः अति सह्रानीय जूगू खँ कनादीगू खः ।

लोडसेडिङ म्हो यायेत दवाव अभियान न्ह्याकीगु


POSTED ON SUN JAN 23, 2011 11:11 AM NST

स्वनिगः दुने न्हिं झिंनिघौ जुयाच्वंगु लोडेसेडिङ म्हो यायेत म्हिगः नेवाः जागरण मञ्चं थनया क्षेत्रपाटी पार्टी प्यालेसय् छगू सहलह ज्याझ्वः यात । 

नेपाःया राजधानी स्वनिगः थें जाःगु अति महत्वपूर्ण शहरय् न्हि झिंनिघौ जुयाच्वंगु लोडसेडिङ व थ्वया लिपा झिंखुघौ तक जुइफुगु लोडसेडिङयात कयाः सहलह यायेगु झ्वलय् जागरण मञ्चया संयोजक सुजीव बज्राचार्यं यदि इलय् हे स्वनिगः दुने लोडसेडिङ म्हो यायेगु नितिं स्वनिगः दुनेया वासीत सचेत जुयाः मन्ह्यात धाःसा आः जुयाच्वंगु लोडसेडिङ खुदँ न्हय्दँ तक जुयातुं च्वनीगु धयादिल । वय्कलं थौंकन्हय् जुयाच्वंगु लोडसेडिङ पक्षपाती रुपय् दकलय् अप्वः स्वनिगलय् लोडसेडिङ यानाच्वंगुलिं सरकारयात लोडसेडिङ म्हो यायेत दवाव बिइगु अभियान न्ह्याकेमाःगु बिचाः तयादीगु खः । 

सहलह ज्याझ्वलय् थीथी क्लव व संघसंस्थाया प्रतिनिधित उपस्थित जूगु खःसा जागरण मञ्चया नेतृत्वय् लोडसेडिङ म्हो यायेगु प्रचारात्मक अभियान न्ह्याकेगु नितिं पर्चा पोष्टर ब्यानर खायेगु क्वःज्यूगु खः ।


http://www.nepalmandal.com/content/12384.html

राज्य पुनःसंरचना समितिइ २३ गू क्षेत्र सुचिकृत


gyan

नेपाल कन्ष्टिच्यूशन फेडेरेशनया ग्वसालय् म्हीग छगू ज्याझ्वःयासें संविधान सभाय् राज्य पुनःसंरचना समितिइ पेश यानातःगु प्रतिवेदनय् स्वायत्त क्षेत्र, विशेष क्षेत्र व संरक्षित क्षेत्र याना २३ गू क्षेत्र सुचिकृत यानातःगु खँय् सहलह जुल । सहलह ज्याझ्वलय् मा. रामबहादुर थापा मगरं छगू कार्यपत्र नं न्ह्यब्वयादीगु खः ।

कार्यपत्रय् सभासद् मंगलसिद्धि मानन्धर, अधिवक्ता सुरेन्द्र महत्तो, प्रा. लोकराज बरालं टिप्पणी यानादीगु खः । ज्याझ्वलय् ब्वति कासें नेवाः देय् दबूया नायः नरेश ताम्राकारं स्वायत्त क्षेत्र, विशेष क्षेत्र व संरक्षित क्षेत्र धइगु मूल त आदिवासीतय्गु पहिचान जूगुलिं थुकि आदिवासीया प्रतिनिधि व पहुँच दुथ्याकेमाःगु खँय् विशेष जोड बियादीगु खः ।

नेवाः देय् दबूया खुक्वःगु मुँज्या


gyan

नेवाः देय् दबूया खुक्वःगु केन्द्रिय समितिया मुँज्या म्हिगःनिसें नेवाः देय् दबूया ज्याकुथि ताम्सिपखय् च्वंगु दु । 

पश्चिमय् जुयाच्वंगु यातायात अबरुद्धया हुनिं अनयापिं केन्द्रिय कमिटीया न्वकू विजया श्रेष्ठ व केन्द्रिय कमिटी दुजः रमेश खेँय्धौमाकु उपस्थित जुयामदीसा बाँकि १५म्हेसिनं ब्वतिकयाच्वंगु दु । 

मुँज्या कन्हय् नं न्ह्याइगु दबूया केन्द्रिय नायः नरेश ताम्राकारं नेपालमण्डलयात जानकारी बियादिल ।

विराटया प्रतिनिधि कवि गोष्ठी


- [ ]


येँ (सन्ध्या टाइम्स)/विराट नेपालभाषा साहित्य सम्मेलन गुथिया लुँबुदिंया लसताय् विराट गुथि व  नेपाल प्रज्ञा प्रतिष्ठानया मातृभाषा साहित्य विभागया मंकाः ग्वसालय् नेपालभाषाया प्रतिनिधि कवि गोष्ठी जुल। प्रतिष्ठानया कुलपति वैरागी काइँला व विशेष पाहां जनकवि दुर्गालाल श्रेष्ठं मंकाः कथं ज्याझ्वःया उलेज्या यानादीगु खः। 
ज्याझ्वलय् जनकवि दुर्गालाल श्रेष्ठ, तिलक प्रकाश कायस्थ, पूर्ण बहादुर वैद्य, प्रतिसरा साय्मि, भगतदास श्रेष्ठ, राजभाई जकःमि, शौरभ शाक्य, नवीन चित्रकार, सुरेश किरण, ईश्वरी मैंया श्रेष्ठ, लगायत स्वीनिम्ह कवि व कवयित्रीपिंसं कविता वाचन यानादीगु खः। 
विराट नेपालभाषा साहित्य सम्मेलन गुथिया नायः त्रिरत्न  शाक्यया सभापतित्वय् न्ह्याःगु उगु ज्याझ्वलय् प्राज्ञ सुलोचना मानन्धर, प्रा. नर्मदेश्वर प्रधानपिसं थःथःगु नुगःखँ प्वंकादीगु खः।


http://www.newanepa.com/show_sahitya.php?id=429



नेपालभाषा प्रतिनिधि कवि गोष्ठी जुइगु

- [ ]
येँ (सन्ध्या टाइम्स)/विराट नेपालभाषा साहित्य सम्मेलन गुथिं थःपिनि लुँबुन्हिया लसताय् नेपाल प्रज्ञा प्रतिष्ठान मातृभाषा साहित्य विभागलिसे जानाः नेपालभाषाया प्रतिनिधि कवि गोष्ठी याइगु जूगु दु।
थ्वहे वइगु शनिवाः नेपाल प्रज्ञा प्रतिष्ठानय् हे उगु ज्याझ्वः यायेत्यनागु खँ गुथिया नायः त्रिरत्न शाक्यं कनादिल। गोष्ठीइ नेपालभाषाया नीन्याम्ह प्रतिनिधि कविपिंसं कविता पाठ याइगु ज्याझ्वः दु।

http://www.newanepa.com/show_sahitya.php?id=428

नेपाः राष्ट्रिय पार्टीया खुल्ला बुन्हि

नेवाःतय् निंतिं नेवाः राजनीति यायेगु धइगु तातुनाः नीस्वंगु नेपाः राष्ट्रिय पार्टीया प्यदँ बुन्हि थुगुसी पार्टी स्थापना दिवसया रुपय् स्वन्हुयंकं स्वंगू थासय् ज्याझ्वः यासें न्यायेकल। थ्व लसताय् पार्टीपाखें विहीवाः थानकोटय्, शुक्रवाः येँ १३ वडाया तख्तिइ व शनिवाः यलया तःबाहालय् तुच्चाया लिसें सभा याःगु खः।
पार्टीपाखें न्हापा न्हापा थःपिनि बुन्हि थुकथं हनेगु मयाः। थुगुसी न्हापांखुसी थथे पिने वयाः बुन्हि न्यायेकल। उकिया कारण बारे पार्टी अध्यक्ष डा. केशवमान शाक्यं धयादी, 'सतकय् वनाः हुलहुज्जत यायेगु, जुलुस नारावाजी यायेत नेपाः पार्टी नीस्वनागु मखु। नेवाःतय्गु निंतिं न्हूगु संरचना, न्हूगु दिशा व न्हूगु राजनीतिक संजाल दयेका वनेगु तातुनाः स्वदँ न्ह्यः नेपाः राष्ट्रिय पार्टी नीस्वनागु खः। थ्व स्वदँया दुने जनतां थ्व पार्टीयात थःगु पार्टी धकाः स्वीकार यायेधुंकूगु दु। उकिं थुगुसी न्हापांखुसी सार्वजनिक रुपं जनताया न्ह्यःने वयाः ज्याझ्वः यानागु खः।'
नेवाःत राजनीतिक रुपं बल्लायेमाः धासें राजनीतिइ नेवाःतय् शक्तिशाली पहुँच मदुगु कारणं यानाः हे थौं देय्या प्रशासनय् ज्या यानाच्वंपिं नेपाल वायुसेवा निगमया कार्यकारी अध्यक्ष सुगतरत्न कंसाकार, नेपाली सेनाया सहायक रथी किरण वज्राचार्य थेंज्याःपिंत कारवाही याना हःगु खः धासें अध्यक्ष शाक्यं उकिया विरोध यानादिल।
तख्तिइ जूगु उगु हे ज्याझ्वलय् प्रा.डा.मृगेन्द्रलाल श्रेष्ठं च्वयादीगु नेवाःतय् तथ्यांक सम्बन्धी सफू 'नेवाः' विमोचन यायेगु ज्या नं जूगु खः। सफू नेपाः राष्ट्रिय पार्टीं हे पिथंगु खः। ज्याझ्वलय् नेपाः राष्ट्रिय पार्टीयात आःतक थीथी कथं ग्वाहालि याना वयाच्वंपिं ई. कुलदिप सिंह, ई. देवदास मानन्धर, प्रा.डा.मृगेन्द्रलाल सिंह व भाजु पुष्प चित्रकारयात हनेगु ज्या नं जूगु खः।
उगु ज्याझ्वलय् सभासद बुद्ध साय्मि, प्रा.डा. मृगेन्द्रलाल सिंह, जनकवि दुर्गालाल श्रेष्ठ, पुलांम्ह मन्त्री व नेकां नेता डा. रामशरण महत, माओवादी सभासद हितमान शाक्य, आदिवासी जनजाति महासंघया नायः राजकुमार लेखी, मधेसी जनअधिकार फोरमया राम सहाय, रमेश मानन्धरपिंसं भिंतुना देछानादीगु खः। १३ वडाया कचा नायः रमेशरत्न स्थापितया सभापतित्वय् न्ह्याःगु उगु ज्याझ्वलय् उत्तमलाल जोशीं लसकुस यानादीगु खःसा चसांद्व त्वाःपाखें बासुरी व गौतम मानन्धरं म्येँ न्यंकादीगु खः।
उकथं हे शनिवाः यलय् नं यल जिल्ला कमिटीपाखें छगू सभाया नापं तुच्चा ज्याझ्वः जुल। पार्टीया केन्द्रीय दांभरि सुरेश प्रधानया सभापतित्वय् तःबाहालय् जूगु उगु ज्याझ्वलय् पार्टीया नायः डा. केशवमान शाक्य, माओवादी सभासद् हिसिला यमि, नेपाली कांग्रेसया सभासद् तीर्थराम डंगोल, पुलांम्ह मन्त्री बुद्धिराज वज्राचार्य, समाजसेवी मोतिलाल शिल्पकारपिंसं न्ववानादीगु खः। न्वकु नरेशवीर शाक्यं लसकुस यासें न्ह्याकूगु उगु ज्याझ्वलय् थीथी जनजाति नेतातय्सं नं न्ववानादीगु खःसा सांगीतिक ज्याझ्वः नं जूगु खः।
उखे थानकोटय् जूगु ज्याझ्वलय् चीनया ग्वानजाउलय् जूगु एशियाडय् नेपाःया लागिं छगूयां छगू जक पदक त्याकेत ताःलाःम्ह कासामि दीपक महर्जनयात हनेगु ज्या जूगु खः।



http://www.nepalmandal.com/content/12425.html


नेपाः राष्ट्रिय पार्टी स्थापना दिवसया लसताय् थौं तःबहालय् ज्याझ्वः

नेपाः राष्ट्रिय पार्टीया स्वक्वःगु स्थापना दिवसया लसताय् थौं यलया तःबहालय् छगू ज्याझ्वः यात ।

उगु ज्याझ्वलय् मूपाहां नापं नेपाः राष्ट्रिय पार्टीया नायः डा. केशवमान शाक्यं नेवाःत थःगु हक अधिकारया लागि सतकय् वयेगु कथं थुगु ज्याझ्वः यानागु धयादिसें नेपालय् शाही शासनकाल, राणा शासन, पंचायती शासनय् जक मखु ०४६ सालया बहुदलीय शासन लिपा ०६२/६३ या जनआन्दोलन लिपा गणतन्त्र वयेधुंकाः नं नेवाःतय्त क्वत्यलेगु ज्या जक जूगु व थःगु पार्टीया मनूत स्वनिगलय् केन्द्रीत यायेगु ज्या जक जूगु खँ धयादिल । थुकिया लागि नेवाःत थःगु हक अधिकारया लागि न्ह्यज्यायेमाःगु बः बियादिसें थःगु थासय् थःम्हेस्यां शासन यायेगु खःसा नेवाःतय्सं नं राजनीति यायेमाःगु खँ धयादिल ।

ज्याझ्वलय् एकिकृत नेकपा माओवादीया पोलिटब्यूरो दुजः नापं सभासद हिसिला यिमं राजनैतिक पार्टी व जातीय पार्टीत नापं जानाः सतक, सदन व सरकारय् संघर्ष याःसा जक संघीयता सुनिश्चित यायेफइगु खँ धयादिल ।

अथेहे संघीय लोकतान्त्रिक राष्ट्रिय मंचया नायः खगेन्द्र माखि्रनं थःगु भूमि प्राप्तिया लागि लिम्बुवान व खम्वुवानया आन्दोलन न्ह्याकाच्वनागु खँ कनादिसें जातिया ऐतिहासिक पृष्ठभूमिया लिधंसाय् संघीयता जुइमाःगु खँ कनादिल ।

नेपाः राष्ट्रिय पार्टीया न्वकू नरेशवीर शाक्यं ज्याझ्वलय् लसकुस यानादिसें नेवाःतय्गु हक अधिकारया लागि पार्टीं सः तयावयाच्वंगु व नेवाःतय्गु अस्तित्व स्व-पहिचानया लागि निर्णायक थासय् थ्यंकेमाःगु खँ कनादिसें सरकारं थी थी योजना हयाः नेवाःतय्त स्वनिगःपाखें विस्थापित यायेत स्वयाच्वंगु धयादिल ।

ज्याझ्वलय् नेपाली कांग्रेसया सभासद तीर्थराम डंगोल, ताम्सालिङ राष्ट्रिय दलया नायः परशुराम तामाङ, नेपाल लोकतान्त्रिक नेवाः संघया न्वकू हरिकृष्ण व्यंजनकार, पुलांम्ह मन्त्री बुद्धिराज बज्राचार्य, समाजसेवी मोतिलाल शिल्पकार, लक्ष्मीदास मानन्धर, ज्यापु समाजया नायः रामकाजी अवाल लगायत ब्यक्तिपिंस नेपाः राष्ट्रिय पार्टी स्थापना दिवसया लसताय् नेवाःतय्गु हक हित व संघीयता सुनिश्चितताया लागि न्ह्याःवने फयेमा धकाः भिन्तुना देछानादिल ।

नेपाः राष्ट्रिय पार्टीया दांभरि सुरेश प्रधानया सभाध्यक्षय् जूगु उगु ज्याझ्वलय् नेपाः राष्ट्रिय पार्टीया छम्ह जक सभासद बुद्ध साय्मिया नं उपस्थिति दुगु खः ।



षड्यन्त्र खतम यायेत झी छप्पँ जुइमाः

डी.आर. खड्गी

माघ ७ गते शुक्रवाः नेपाः राष्ट्रिय पार्टीया प्यदँ बुन्हिया लसताय् सभा व तुच्चा ज्याझ्वः येँ १३ वडाया निलबाराहीइ भव्य रुपं जुल। सभाय् नेपाः पार्टीया सभापति केशवमान शाक्यं भाषण बीगु झ्वलय् १२ लाख स्वनिगःया नेवाःतय्त विस्थापित यायेत खसब्रम्हूतयसं षडयन्त्र यानाच्वंगु खँ कनादिल। नेवाःतय्सं याना वयाच्वंगु चीधंगु व्यापारंनिसें ततःधंगु व्यापार तक गैर नेवाःतय्सं कब्जा यानाः नेवाःतय्त गरीब यायां यंकाच्वंगु दु। थुलि जक मखु सरकारी कार्यालयय् नोकरी यानाच्वंपिंत नं टेन्सन बियाः धमाधम हटे यानाच्वंगु दु। खसब्रम्हूया मुख्य नीति धइगु नेवाःतय्त कमजोर यायेत व्यापार व नोकरी पेशां विस्थापित यायेगु खः। जब आर्थिक अवस्था कमजोर जुइ व्यक्तियाके ल्यं दुगु अचल सम्पत्ति नं मीत बाध्य जुइ। स्वनिगःया नेवाःतय्सं धमाधम थःगु छेँबुँ मियाच्वंगुया कारण थ्व हे खः। नेवाःतय्गु छेँबुँ न्यानाच्वंपिं नं वहे कमिशन व भ्रष्टाचार याइपिं खसब्रम्हूत खः। नेवाःतय्गु छेँबुँ न्याःपिं गैर नेवाःत झीगु हे सम्पत्ति अप्रत्यक्ष रुपं लुटे यानाच्वंपिं खः धकाः झीसं बांलाक सिउ ।

२०४६ साल न्ह्यः न्ह्यागुं सरकारी ज्याकुथी अप्वः नेवाःतय्सं ज्या यानाच्वंगु खः। व इलय् अफिस-अफिसया अवस्था बांलानाः देय्या आर्थिक अवस्था मजबुत जुयाच्वंगु खः। इमान्दार, सक्षम व नैतिकवानया ल्हातय् सत्ता लात कि देशया अवस्था नं भिनीगु स्वाभाविक हे खः ।

नेवाःत अप्वः हे इमान्दार व नैतिकताय् च्वनाः ज्या याइपिं जूगुलिं ०४६ साल न्ह्यः देय्या आर्थिक अवस्था ठीक जुयाच्वंगु खः। दसुया लागिं नेपाल बैंक नेवाःतय्गु ल्हातय् दुगु इलय् बैंकया अवस्था तसकं बांलानाः अन्तर्राष्ट्रय् तकं इज्जत व प्रतिष्ठा दयाच्वंगु खः। तर खसब्रम्हूतय्सं बैंकय् प्रवेश याये धुंकाः बैंकया इज्जत व प्रतिष्ठा ध्वष्ट जुल। बैंक जक मखु चीन व सोभियत संघं सहयोग स्वरुप स्थापना याःगु उद्योगनापं ध्वष्ट यात। अनं लिपा कमिशन नयाः विदेशीतय्त मिया बिल। दक्षिण एशियाय् प्रख्यात जुयाच्वंगु यातायात सुविधा, ट्रलिबस व साझा यातायात नं ध्वष्ट यात। गन खसब्रम्हूत दुहां वनी, अन ध्वष्ट यायेगु ज्या जुइ धकाः जनतां मसिउगु नं मखु। सीक सीकं हाकनं वहे खसब्रम्हूतय्त छक्वः नेवाः व जनजातितय्सं अप्रत्यक्ष रुपं साथ नं बियाच्वंगु दु धाइ। 
२०४६ सालया हिउपाः लिपा खस-ब्रम्हूतपाखें अप्वः पीडित जुयाच्वंपिं स्वनिगःया नेवाःत खः। पिनेयापिं खसब्रम्हूत स्वनिगलय् वयाः राजनीति थःगु ल्हातय् लाकेत धमाधम नेवाः नेतातय्त माईनस यायां यंकूगु खः। कांग्रेसया नेता गणेशमान सिंहयात नं हायल कायल यानाः पार्टीं राजीनामा बीत बाध्य यात। कम्युनिष्टया उच्च नेतात तुलसीलाल, शम्भुराम, विष्णुबहादुर मानन्धर थेज्याःपिं देशप्रेमी व विद्वानतय्त नं शक्तिहीन यायां यंकल। जब उच्च नेवाः नेतात माइनस जुल तब राजनीतिक ख्यलय् खसब्रम्हूया हालिमुहाली जुल। खसब्रम्हूतय्गु ल्हातय् राजनीतिया शक्ति लायेवं राजनीतियात नं व्यापार दयेका यंकल ।

सुं जातिया ल्हातय् राजनीति लानाच्वनीगु धइगु वयागु ल्हातय् राज्यया स्वंगुलिं अंग-न्यायपालिका, कार्यपालिका व व्यवस्थापिका लानाच्वनीगु थें हे खः। वहे राज्यया स्वंगूगु अंग प्रयोग यानाः नेवाःतय्त कमजोर व शक्तिहीन यायेत ज्या यानाच्वंगु खः। नेवाःतय्त छखे प्रशासनं अनेक झंझट बियाः दुःख, कष्ट यानाच्वंगु दुसा मेखे हाकनं नेवाःतय्गु थासय् कर अप्वः कयाः आर्थिक अवस्था डांवाडोल यानाच्वंगु दु। यदि सुं नेवाःतय्सं प्रशासन ख्यलय् वा मेगु ख्यलय् भचा बांलाक ज्या क्यनेगु कुतः यात कि वयात फुक्क खसब्रम्हूत मिले जुयाः ध्वष्ट याना बी। थौंकन्हय् नेपाल वायुसेवा निगमया हाकिम सुगतरत्न कंसाकार व नेपाली सेनाया सहायक रथी किरण बज्राचार्य नं खसब्रम्हूया चक्करय् लानाच्वंगु खः ।

विश्वया यक्व देशय् स्थानीयवासीत खालि संस्कृतिइ जक ध्यान बियाः राजनीतिया चेतना कम जूगुलिं पिनें वयाच्वंपिंसं विस्थापित यायेत सफल जूगु खः। झीगु देशय् नं नेवाःतय्सं राजनीतिइ कम व संस्कृतिइ अप्वः ध्यान बियाच्वंगुलिं खसब्रम्हूत शक्तिशाली जुयाच्वंगु खः। यदि भावनात्मक रुपं छप्पँ जुइफत धाःसा अल्पमतं नं बहुमतयात शासन यायेफु धइगु खँ इतिहासं नं क्यनाच्वंगु दु। अल्पमत खसब्रम्हूतय्सं शासन यानाच्वंगु कारण नं थ्वहे खः। थ्वया अर्थ झी साम्प्रदायिक जुइमाः धयागु मखु। खसब्रम्हूया साम्प्रदायिक भावना विरुद्ध झी फुक्क छप्पँ जुइमाः धायेत्यनागु जक खः। छाय्धाःसा खसब्रम्हूतय्सं थःगु जातिया हित बाहेक मेगु जातियात वास्ता याइ मखु। 
तराइलय् खसब्रम्हूतय्सं राज्यया न्यायपालिका व प्रशासनयात उपयोग यानाः मधेशीतय्त अति हे शोषण यानाच्वंगु खः। मधेशीतय्के राजनीतिया जागरण वयेधुंकाः इमिसं थःगु लागाय् थःपिंत हे शोषण यानाच्वंगु खँ थुइकल। अले थःपिंत शोषण यानाच्वंगु जातियात ख्याना छ्वयेमाल धकाः फुक्क छप्पँ जुयाः खस ब्रम्हूतय्त पितिना छ्वल। २१ प्रतिशत दुपिं मधेशी जातिं राज्यया ४४ प्रतिशत मन्त्रिमण्डल कब्जा यायेत सफल जुल। तराइलय् जक मखु जनजातिया प्रदेश-राई, लिम्बु, मगर व बाहुल्य दुगु थासय् नं खसब्रम्हूतय्सं छलकपट व षड्यन्त्र यानाः जनजातियात शोषण याःगुलिं जनजातिया थासं नं धमाधम पितिनेगु शुरु यात। देशया फुक्क थासं खसब्रम्हूया छलकपट व षड्यन्त्रयात ध्वष्ट याःगुलिं आः इमिगु मुख्य केन्द्र स्वनिगः जुयाच्वंगु दु। स्वनिगलय् इपिं सुरक्षित रुपं च्वनेत थनया नेवाःतय्त विस्थापित यायेत तःधंगु षड्यन्त्रया कुतः यानाच्वंगु दु। थुमिसं न्ह्याक्व हे प्रजातन्त्रया सिद्धान्त पाठ याःसां, कम्युनिष्टया सिद्धान्त पाठ याःसां नं सक्कली कांग्रेस अथवा कम्युनिष्ट जुइ हे मखु। तर अफशोच थुपिं ढोंगी व बदमास खः धइगु सीक सीकं नं गुलिं नेवाःत पार्टीया नामं अले गुलिं व्यक्तिगत फाइदाया लागि हनुमान जुयाच्वन। नेवाःत कमजोर जुया वनाच्वंगुलिं नेतातय् लिउ लिउ वनाच्वंगु खः धकाः जनतां धयाच्वंगुलिं झी थःगु हे शक्तियात भरोसा यानाः संघर्षय् कुहां वयेमाः । 

drkhadgi@gmail.com
http://www.nepalmandal.com/content/12469.html

Tuesday, January 18, 2011

Understanding #Social #movement in #Nepal: A general perspective

Understanding #Social #movement in #Nepal: A general perspective (Social structural change of Nepal vis-a-vis change in #Newa(r) community) .pdf file


नेवाः एकता दिवसया छुं [सिटिजन एफएमया पल्पसा रेडियो ज्याझ्वः]

POSTED ON TUE JAN 18, 2011 12:04 PM NST

नेपालभाषा रेडियो ज्याझ्वः आर्काइभ याना यंकेगु झ्वलय् न्हापांगु शुरुवात कथं स्वनिगःया सिटिजन एफएमय् वाः पतिं न्ह्याइगु 'पल्पसा' ज्याझ्वः थन ब्वयाच्वना । थुगु ज्याझ्वः आइतवाः पतिं ९४ मेगाहर्जय् थ्वइ । 

वंगु आइतवाःया थुगु 'पल्पसा' ज्याझ्वलय् ज्याझ्वः न्ह्याकामि सुरजवीर वज्राचार्यं वंगु बिहिबाः जूगु नेवाः एकता दिवस विषयय् विशेष ज्याझ्वः न्ह्यब्वःगु खः । 

पूवंक ज्याझ्वः न्यनेत क्वय् च्वंगु प्लेयरय् क्लिक यानादिसँ । 

ब्लग > नेवाः देय् दबू गतिविधि

विराट नेवाः महोत्सव

Tue Jan 18, 2011 6:36 am NST
झी पुचः विराटनगरया ग्वसालय् विराटनगरय् विराट नेवाः महोत्सव जुल । महोत्सवया उपप्रधानमन्त्री विजयकुमार गच्छेदारं उलेज्या यानादीगु खः । झी पुचः विराटनगरया नायः राजन श्रेष्ठया सभापतित्वय् जूगु उगु महोत्सव उलेज्या समारोहलय् ...[पूवंक]

झापाय् बाखँ मुँज्या
Tue Jan 18, 2011 6:36 am NST
नेवाः देय् दबू झापा जिल्ला समितिया ग्वसालय् झापाय् बाखं मुँज्या जुल । झापा जिल्लाया प्रमुख जिल्ला अधिकारी शशीशेखर श्रेष्ठया मूपाहांसुइ जूगु उगु ज्याझ्वलय् नेवाः देय् दबूया नायः नरेश ताम्रकार, नेवाः ... [पूवंक]

धरानय् सिद्धि नेवाः परिषदया तःमुँज्या
Tue Jan 18, 2011 6:35 am NST
सिद्धि नेवाः परिषदया झिंखुक्वःगु तःमुँज्या धरानय् क्वचाल । तःमुँज्या उलेज्या नेवाः देय् दबूया संरक्षक लक्ष्मण राजवंशीं यानादीगु खः । सरला कायस्थया सभापतित्वय् जूगु उगु तःमुँज्यां सरला कायस्थया हे नायसुइ न्हूगु ... [पूवंक]

धनकुटाय् सहलह मुँज्या
Tue Jan 18, 2011 6:35 am NST
नेवाः देय् दबू धनकुटा व नेवाः पुचः धनकुटाया मंकाः ग्वसालय् धनकुटाय् स्थानीय नेवाः संघ संस्थात नापं नेवाः देय् दबूया सहलह मुँज्या जुल । नेवाः देय् दबूया केन्द्रीय उपाध्यक्ष नवीणकिशोर शाक्यया ... [पूवंक]

इटहरीइ सहलह मुँज्या
Tue Jan 18, 2011 6:32 am NST
नेवाः पुचः इटहरीया ग्वसालय् नेवाः देय् दबूया पदाधिकारी व स्थानीय नेवाः संघ संस्थातय् दथुइ सहलह मुँज्या जुल । नेवाः पुचः इटहरिया नायः चित्रमान श्रेष्ठया सभापतित्वय् जूगु उगु सहलह मुँज्याय् मूपाहां ... [पूवंक]

उर्लाबारीइ न्हू पुचः नाप सहलह मुँज्या
Tue Jan 18, 2011 6:32 am NST
नेवाः देय् दबूया नायः नरेश ताम्रकारं उलाबारीया न्हू पुचः नाप सहलह यानादिल । न्हू पुचःया नायः चन्द्रबहादुर श्रेष्ठया सभापतित्वय् जूगु उगु सहलह मुँज्याय् नेवाः देय् दबूया संरक्षक लक्ष्मण राजवंशी, नेवाः ... [पूवंक]

विराट चोकय् प्रशिक्षण ज्याझ्वः
Tue Jan 18, 2011 6:31 am NST
नेवाः देय् दबू मोरङ जिल्ला समितिया नायः देवेन्द्र श्रेष्ठया सभापतित्वय् मोरङ जिल्ला न्यंकंया नेवाः संस्थातय् प्रतिनिधिपिंत संगठन सुदृढिकरण विषयय् प्रशिक्षण ज्याझ्वः जुल । उगु ज्याझ्वलय् नेवाः देय् दबूया नायः नरेश ... [पूवंक]

उदयपुरय् नेवाः नसा त्वंसा स्यनेज्या
Tue Jan 18, 2011 6:29 am NST
नेवाः देय् दबू उदयपुर जिल्ला समिति व नेवाः पुचः उदयपुरया मंकाः ग्वसालय् उदयपुरय् नसा न्वंसा ब्वज्या व स्यनेज्या जुल । मध्यपुर कला परिषदपाखें भाजु राम प्रजापति व मय्जुपिसं उगु तालिम ... [पूवंक]

http://www.nepalmandal.com/cat/73/1.html