थिमि (सन्ध्या टाइम्स)/नेवाः स्वायत्त राज्य मंकाः संघर्ष समिति मध्यपुर थिमि लागां मोहनि नखः न्ह्यः तक प्रचारात्मक आन्दोलन याइगु जूगु दु। नेवाः स्वायत्त राज्यया अवधारणा कथं मध्यपुर थिमि नगरपालिकाय् न्ह्यब्वःगु च्यागू सूत्रीय माग पूरा याकेगु निंतिं आन्दोलनया ज्याझ्वः कथं न्हापांगु चरणय् प्रचारात्मक आन्दोलन यायेगु खँ क्वःछिनागु जानकारी मंकाः संघर्ष समितिया मध्यपुर थिमि लागाया नायः कृष्णलाल गोजां बियादिल ।
म्हिगः बहनी मुँज्या च्वनाः संघर्ष समितिपाखें मोहनि नखः न्ह्यः तकया दुने थःपिंसं नगरपालिकाय् तयागु माग, नेवाः स्वायत्त राज्यया अवधारणा कथं नेवाःत न्ह्यःने वनेमाःगु नापं थीथी कथंया खँ थुइकेगु नितिं सभा, भेला यायेगु, पर्चा पिकायेगु नापं प्रचारात्मक ज्याझ्वः यायेगु खँ क्वःछिउगु खः। मोहनि नखः तकया दुने अनया बालकुमारी, चपाच्व, नगदेश व बोदे लागाय् ब्यागलं ब्यागलं कथं ज्याझ्वः यायेगु जुइ धाःगु दु। न्हापांगु प्रचारात्मक आन्दोलन यानाः नं माग पूरा मजल धाःसा अनं लिपा सशक्त कथं आन्दोलन यायेगु जुइ धकाः नं गोजां धयादीगु दु ।
नेपालभाषा एम.ए.परीक्षाय् दकलय् अप्वः ल्याः हयाः उत्तार्ण जूम्ह ब्वँमियात 'पीयूष पदक' व मय्जुपिं मध्येय् दकलय् अप्वः ल्याः हयादीम्ह छात्रायात बीगु 'चैन लाकौल सिरपाः' थौं छगू ज्याझ्वःया दथुइ लःल्हात । नेपालभाषा केन्द्रीय विभागया नायः प्रा. प्रेमशान्ति तुलाधरया सभाध्यक्षय् जूगु थुगु ज्याझ्वलय् मूपाहां त्रिविविया शिक्षाध्यक्ष प्रा. डा. सूर्यलाल अमात्यजुं 'पीयूष पदक' सानुराजा शाक्ययात व 'चैन लाकौल सिरपाः' मय्जु अमृता महर्जनयात लःल्हानादीगु खः ।