#Nepal's national #flag deformed

Sandhya Times, Feb 18

The official website of ACC Women's T20 Championship 2011 ongoing in Kuwait has posted deformed national flag of Nepal. The website www.cricketkuwait.org shows Nepal's flag as rectangular in shape and completely omits blue color of the flag. Nepal's national flag is the world's only national flag that is non-quadrilateral in shape. The flag is a simplified combination of two single pennons (triangles), crimson-red colored with blue border and emblems of the sun and the crescent moon depicted in the triangles.

नेपाःया प्यकुं लाःगु ध्वाँय्

POSTED ON FRI FEB 18, 2011 9:56 PM NST

Share

येँ(सन्ध्या टाइम्स)/कुवेतय् न्ह्यानाच्वंगु मिसा क्रिकेटया वुमेन्स एसीसी टी-ट्वान्टी च्याम्पियनशीप २०११ आधिकारीक वेबसाइटय् नेपाःया राष्ट्रिय ध्वाँय् प्यकुं लाःगु तयातःगु दु। क्रिकेट कुवेत डट ओरजी (cricketkuwait.org) इ थुकथंया नेपाःया ध्वाँय् तयातःगु खः ।

उगु वेबसाइट चायेकेवं कासाय् सहभागि देय्या धलखय् मलेशियाया क्वसं नेपाः दुसा उकी क्लिक यायेवं नेपाःमि टीमया नां तयातःगु च्वसं नेपाःया प्यकुं लाःगु ध्वाँय् तयातःगु खः। जबकि उकिया जवय् टीम/अफिसियलया धलः दुथाय् धाःसा नेपाःया पुलांगु हे ध्वाँय् तयातःगु दु ।

http://www.nepalmandal.com/content/12777.html

International Mother Language Day to be observed in Nepal

13 Feb. 2011, Sandhya Times Nepal bhasa daily

Bangladesh's embassy in Kathmandu and Lija: Nepal bhasa (Newar language) Kabita Daboo (Lija Nepal bhasa Poem forum) will organize various literary and musical programs of different languages to observe International Mother Language Day on Feb 21 in the embassy. The program will see participation from poets and singers of Nepal bhasa and other languages. Bangladeshi ambassador Dr. Nemchandra Bhoumik will chair the program that have been organized annually since 2001 by the organizations.

See the original news article below

मातृभाषा दिवस

POSTED ON SUN FEB 13, 2011 9:34 PM NST

Share5

येँ (सन्ध्या टाइम्स)/सन् २००० निसें दँय्दसं न्ह्याका वयाच्वंगु अन्तर्राष्ट्रिय मातृभाषा दिवस थुगुसी नं येँया बंगलादेश दूतावास व लिजः नेपालभाषा कविता दबूया ग्वसालय् जुइत्यंगु दु। थ्वहे फागुन ९ गते बंगलादेश दूतावासय् थीथी भाषाया साहित्यिक व संगीत ज्याझ्वः नापं ज्यापौ न्ह्यब्वयाः उगु दिवस हनेत्यंगु खः। नेपालभाषाया कवि नापं गायकपिंसं नं ब्वति काइगु उगु ज्याझ्वः बंगलादेशया राजदूत डा. नेमचन्द्र भोमिकया अध्यक्षताय् जुइ। मातृभाषा दिवस नेपालय् न्हापांखुसी बंगलादेश दूतावास व लिजःया हे ग्वसालय् सन् २००१ स जूगु खः ।

http://www.nepalmandal.com/content/12709.html

आइएलओ १६९ सम्बन्धी नेपाः सरकारया प्रतिवेदनबारे गोष्ठी

Posted on Mon Feb 7, 2011 11:43 pm NST

Share 

राष्ट्रिय मानवअधिकार आयोगया ग्वसालय् आदिवासी अधिकार सम्बन्धी अन्तराष्ट्रिय घोषणापत्र आइएलओ १६९ सम्बन्धी नेपाः सरकारया न्हापांगु प्रतिवेदनयात कयाः छगू बिचाः गोष्ठी जुल ।

नेवाः देय् दबूया नायः नरेश ताम्रकारं नं ब्वति कयादीगु उगु गोष्ठी आयोगया दुजः राम नगिना सिंहया सभापतित्वय् जूगु खः । ज्याझ्वलय् डा मुक्ता सिंह लामां प्रतिवेदनय् दुगु सवल पक्ष व दुथ्याके माःगु पक्षया बारे कार्यपत्र न्ह्यब्वयादीगु खः ।

अथेहे ज्याझ्वलय् न्ववानादिसें देय् दबूया नायः ताम्रकारं सन् २००९ हे छ्वयेमाःगु प्रतिवेदन निदँ लिपा नं मछ्वःगु धासें आपत्ति प्वंकादिल । आइएलओ १६९ कार्यान्वयन यायेगु कार्ययोजना मन्त्रिपरिषदं दच्छि न्ह्यः निसें पारित मयासें थाकातःगु खँयात कयाः नं नायः ताम्राकारं कुंखिनादिल ।

वय्कलं आइएलओ १६९या प्रावधान कथं संविधान दयेकेगु इलय् आदिवासीत नाप सहलह यायेमाःगु जूसां संविधानसभां आः तक अज्याःगु सहलह यायेगु व सुझाव मुंकेगु संयन्त्र मदयेकूगु बारे नं आयोगया ध्यानाकर्षण याकादीगु खः ।

http://www.nepalmandal.com/content/12623.html

स्वदँ क्यन नेपालमण्डल डट कम

Posted on Mon Feb 7, 2011 11:26 pm NST

Share41

थौं श्रीपंचमि । नेपालमण्डल डम कम थौं निदँ फुनाः स्वदँ क्यंगु दु ।

निदँतकया दुने नेपाः दुने व नेपाः पिनेया आपालं ब्वनामिपिंसं थुकियात माया, मतिना यानाः बियादीगु सल्लाह, सुझाव व प्रतिकृयां झीत अझ धिसिलाक्क न्ह्याः वनेत ह:पाः ब्यूगु दु । छिकपिनिगु हे सुझाव कथं थुगु पोर्टलयात अझ सशक्त रुपं भाषिक आन्दोलनया ख्यलय् व निष्पक्ष समाचार, अडियो, भिडियो ब्लग नापं देय् दुने व देसंपिनेया गतिविधि दुथ्याकेत झी न्ह्याःवनेगु जुइ ।

निदँ दुने छिकपिंसं क्यनादीगु मतिना व सद्धभाव प्रति नेपालमण्डल पुचःपाखें कृतज्ञता प्वंकूसें वइगु दँय् नं छिकपिनिगु माया व मतिना नापं मचा:मगा: कुला: छ्याताया अपेक्षा यासें छिकपिं सकसितं आपालं आपाः सुभाय् देछासें थःगु पलाः अझ धिसिलाक्क न्ह्याका वनेगु प्रतिवद्धता प्वंकाच्वना ।

http://www.nepalmandal.com/content/12622.html

नेवाः जागरण मञ्चया भिंतुना

Posted on Mon Feb 7, 2011 11:18 pm NST

Share 

नेपालमण्डल डट कम निदँ फुना स्वदँ क्यंगु लसताय् नेवाः जागरण मञ्चं भिंतुना देछाःगु दु ।

नेवाः जागरण मञ्चया कजि सुजीव बज्राचार्यं बियादीगु भिंतुनाय् थुगु वेबसाइटं सफलतापूर्वक निदँ पूवंकूगु सकल नेवाःतय्गु निंतिं लसताया खँ जूगु खँ न्ह्यथनादीगु दु ।

भिंतुना सन्देशय् हलिमय् न्यंकया थीथी थासय् च्वनाच्वंपिं नेवाःतय्त नं छथाय् हे च्वना थें छगू हे भावनाय् माःहना तयेगु ज्या यानाच्वंगु नेपालमण्डल डटकमया ज्या अतिकं च्वछायेबहःगु माध्यम जूगु खँ न्ह्यथंगु दु ।

नेवाः भाषा, साहित्य, कला, संस्कृति व नेवाः आन्दोलनयात तिबः बीगु ज्या यानाच्वंगु थुगु वेब साइटं निरन्तर प्रगति यासें अझ आपाः तिबः बियाः न्ह्यचिलीगु आशा नं जागरण मञ्चं प्वंकूगु दु

http://www.nepalmandal.com/content/12621.html

वर्ल्ड नेवाः अर्गनाइजेशनपाखें भिंतुना

Posted on Mon Feb 7, 2011 11:14 pm NST

Share4

हलिंन्यंक च्वनाच्वंपिं नेवाःत जाना नीस्वंगु वर्ल्ड नेवाः अर्गनाइजेशन निस्वना पुचःपाखें नेपालमण्डल डटकमयात भिंतुना प्राप्त जूगु दु ।

अर्गनाइजेशन नीस्वना पुचःया नायः दयारत्न शाक्यं छ्वयादीगु भिंतुना सन्देशय् आधुनिकताया लुखाखरुइ पिहांवःगु नेपालमण्डल डटकमं निदँया दुने हे हलिमय्न्यंकया नेवाःतय्त मांदेय्या बुखँ थःगु हे भासं ब्वंका सुनां नं मयाःनिगु ज्या यानाः शंखधर सिरपाः तकं त्याकूगु ज्वःममलागु व धिसि लाःगु पलाः जूगु धासें भिंतुना बियादीगु दु ।

नेपाल संवत् ११३१ निसें ११४०या दशकयात नेवाः दशक कथं हनेगु तातुंगु वर्ल्ड नेवाः अर्गनाइजेसनया सकल दुजःपिंपाखें नेपालमण्डल स्वदँ क्यंगु लसताय् भिंतुना देछाःगु दु 

http://www.nepalmandal.com/content/12620.html 

मंकाः खल यलपाखें नेपालमण्डलयात भिंतुना

Posted on Mon Feb 7, 2011 11:10 pm NST

Share 

नेपालभाषा मंकाः खल यलपाखें नेपालमण्डल डट कम निदँ फुनाः स्वदँय् क्यंगु लसताय् भिंतुना देछाःगु दु ।

मंकाः खलया न्हूम्ह नायः किरण शाक्यं बियादीगु भिंतुनाय् संचारया न्हूगु व अत्याधुनिक माध्यमपाखें नेपालभाषाया माध्यमं नेवाः जातिया थीथी बुखँ हलिंन्यंक च्वपिं नेवाःतय् दथुइ थ्यंकेत नेवालमण्डल ताः लाःगु खँय् लसता प्वंकादीगु दु ।

नेपालभाषाया ल्याय्म्ह पत्रकारतय् कार्य कुशलता व मिहिनतया हुनिं चीहाकःगु इलय् नेपालमण्डलं थःगु तातुना कथंया ज्या सुथांलाक्क न्ह्याकूगु खँ भिंतुना पतिइ न्ह्यथनातःगु दु ।

नेवाःतय्गु समग्र विकास व नेवाः राज्य प्राप्तिया निंतिं न्ह्याकीगु हरेक पलाखय् मंकाः खलः नेपालमण्डल डटकम नाप न्ह्यवलें नापं दइगु प्रतिबद्धता नं मंकाः खलपाखें प्वंकूगु दु ।

http://www.nepalmandal.com/content/12619.html

नेवाः देय् दबू पाखें भिंतुना

POSTED ON TUE FEB 8, 2011 7:13 PM NST

Share

नेपालमण्डल डटकम निदँ फुनाः स्वदँ क्यंगु लसताय् नेवाःतय् राष्ट्रिय संगठन नेवाः देय् दबू पाखें लसता प्वंकूगु दु ।

नेवाः देय् दबूया नायः नरेश ताम्राकारं छगू भिंतुनाः सन्देश छ्वयाः नेपालमण्डलयात भिंतुना बियादीगु दु । भिंतुना पौलय् 'आःया समाचार आः हे' धइगु क्वातुगु मूवंगु भावनां अभिप्रेरित नेपालमण्डल डटं वंगु निदँ न्ह्यः निसें ज्वः मदुगु भूमिका म्हितेत ताःलाःगु खँ न्ह्यथनातःगु दु ।

नेवाः तजिलमि व नेपालभाषाया प्रचार प्रसार यायेगु, हलिमय्न्यंकया थीथी बुखँ हलिमय् कुंकुलामय् तकं थ्यंकाः सुशुचित यायेत नेपालमण्डल डटकम ताःलागु धासें देय् दबूलिं लसता प्वंकूगु दु ।

अथेहे भिंतुना सन्देशय् देय् दबूलिं नेपालमण्डल डटकलं सकल नेवाःतय्त नेवाः राजनीतिक आन्दोलनया चेताना थना नेवाः स्वायत्त राज्य प्राप्तिया आन्दोलनयात अझ सशक्त रुपं न्ह्याका वनेत बः जुयाबी धइगु भलसा काःगु दु ।

नापं हलिमय् नेवाः तजिलजि, भाषा, लिपि व थीथी बुखँया प्रचार प्रसार व सम्प्रेशन यायेगु ज्याय् सदां पला न्ह्याका च्वनेमाः धइगु भिंतुना नं ब्यूगु दु ।

http://www.nepalmandal.com/content/12627.html

अर्थपिथना प्रकाशनपाखें भिंतुना

POSTED ON TUE FEB 8, 2011 8:52 PM NST

Share

अर्थपिथना प्रकाशन प्रा. लि.पाखें नं नेपालमण्डल डटकम निदँ फुनाः स्वदँय् क्यंगु लसताय् भिंतुना देछाःगु दु ।

प्रकाशनपाखें पिहांवयाच्वंगु नेपालभाषाया ल्वकंह्वाःगु न्हिपौ सन्ध्या टाइम्सया सम्पादक सुरेश मानन्धरं छ्वयादीगु भिंतुना सन्देशय् थौंया संचार युगया थ्व इलय् इन्टरनेटया माध्यमं विश्वन्यंकया नेवाःतय्त छगू हे लसय् हयाः नेवाः एकता क्वातुकेगु ज्या यानाच्वंगु नेपालमण्डल डटकमया भूमिका च्वछ्येबहः जूगु धयादीगु दु ।

भिंतुना सन्देशय् नेवाः एकताय क्वातुकेत नेपालमण्डल डटकमं म्हिताच्वंगु भूमिका अझ धिसिलाक न्ह्याना च्वनेफेमाः धकाः मनतुना तःगु दु ।

http://www.nepalmandal.com/content/12643.html

सदनय् नेवाः भाय्

Posted on Sun Feb 6, 2011 9:48 pm NST

Share7

येँ (सन्ध्या टाइम्स)/प्रधानमन्त्री ल्ययेगु न्हि कुन्हु सदनय् नेपाः राष्ट्रिय पार्टीया बुद्ध साय्मिं मुक्कं नेवाः भासं संवोधन यानादिल। टेलिभिजनं पत्यक्ष प्रशारण जुयाच्वंगु उगु बैठकय् वय्कलं मुक्कं नेवाः भासं संवोधन यानादीगुलिं स्वनिगलं पिने च्वंपिं नेवाःतय्सं नं वय्कःयात सुभाय् बियाहःगु दु ।

http://www.nepalmandal.com/content/12602.html

राज्य पुनर्संरचना मदुगु संविधान

Posted on Sun Feb 6, 2011 9:44 pm NST

Share 

उत्तमराज शिलाकार

देय्या मू कानून खः संविधान। नेपालय् न्हूगु संघीय लोकतान्त्रिक संविधान च्वयेगु ज्या जुयाच्वंगु दु। न्हूगु संविधानय् दुथ्याकेमाःगु आपालं खँया मस्यौदा च्वयेगु ज्या जुइधुंकूगु दु। मस्यौदाय् माःगु सहलह ब्याकाः उकियात संवैधानिक समितिं सदनय् पेस यानाः पास जुल कि संवैधानिक मान्यता दइ। संवैधानिक मस्यौदाया बुँदाया खँय् आपालं सहलह ब्याकाः निर्णय याये ल्यं दनि। अज्याःगु बुँदात मध्येय् राज्य व्यवस्था, राज्य प्रमुख, शासकीय प्रमुख, राज्य पुनर्संरचना आदि लानाच्वंगु दु। उकी मध्ये राज्य व्यवस्था व शासकीय प्रमुख बारे दलतय् दथुइ सहलह ब्याकाच्वंगु दु। राज्य पुनर्संरचना छगू थातिं लानाच्वंगु दु। न्हूगु संविधान आः वइगु जेष्ठ १४ गते पिकायेमाःगु तर राज्य पुनर्संरचना थेंज्याःगु गम्भीर विषयय् सहलह ब्याकेत ई मगाः धइगु त्वहचिनाः थ्व छगू विषययात त्वःताः जूसां न्हूगु संविधान १४ गते पित बीगु तयारी जुयाच्वंगु खँ सीदुगु दु गुकियात नेपाःया जनजातितय्सं अवश्य नं विरोध याइ। संघीय गणतन्त्रया मू खँ संघीयता खः। उकिं उकी संघीय राज्यत दये हे माःगु जुल। न्हूगु संविधानय् मूलभूत खँ हे त्वःफिकाः च्वइगु संविधान पूर्ण संविधान जुइ मखु। उकिं आः वइगु संविधान यदि धाथेंया हे संघीय लोकतान्त्रिक गणतान्त्रिक संविधान दयेकेगु खःसा उकी राज्य पुनर्संरचना त्वःफिके हे मजिउ।
संघीय गणतन्त्रया मू मर्म धइगु संघीयता खः। संघीयताय् दुने दइगु संघ (प्रान्त) खः। थुकी दुने च्वनाः जनजातितय्सं थःथःगु क्षेत्र दुने थःपिंसं हे विकासया ज्याझ्वःत न्ह्याकी। संघीयताया विशेषता धइगु सकल जातजातिं निर्धारित क्षेत्र दुने च्वनाः थःपिंत माःगु नयेगु, त्वनेगु, पुनेगु व च्वनेगु क्षेत्र (कर्मभूमि) नापं ज्या (लजगाः)या व्यवस्था नं संघ दुने हे दयेकेगु खः नापं थःपिनि क्षेत्र दुने स्थानीय राज्य व्यवस्थाय् तकं स्थानीय जनजातियात समानुपातिक रुपं ल्हाः तये खनीगु व्यवस्था जुइगु खः। मेकथं धायेगु खःसा थःपिनि जन्मभूमिइ हे कर्मभूमि नं दयेके दइगु खः। थःपिनि क्षेत्र दुने थःपिनिगु हे संस्कृतियात ल्वः कथंया अलग राज्य व्यवस्था नं दइगु खः। च्वय्या फुक्कं खँत दयेकेत थःपिनि अलग हे निश्चित कार्यक्षेत्र निर्धारित जुइमाः। थथे संघीय व्यवस्था कथं दइगु भू-क्षेत्र निर्धारण हे मयासे संविधान दयेकेगु खःसा व नां मात्रया संघीय गणतन्त्र जुइ ।

जनताया म्यान्डेट कयाः न्हूगु संविधान दयेकेत वःपिं ६०१ म्ह सभासदपिनिगु मू ज्या धइगु जन आकांक्षा कथंया संविधान दयेकेगु खः। थगुने हे पिब्वयेमाःगु संविधान इलय् पित बी मफुत। थःपिंसं हे तंगु दछिया ई नं आः न्याला जक ल्यं दनि। संविधान दयकेत बिउगु अमुल्य ईयात मात्र दलगत स्वार्थय् प्यपुनाः प्रधानमन्त्री जुइगु तर्खरय् सितिं छ्वयाच्वंगु दु। आः दनिगु ईयात सदुपयोगु यायेगु खःसा अझ नं ई दनि। न्यालाया ई धइगु नं म्हो मजू। थःपिनि इच्छाशक्ति संविधानयात पूर्णता बीगु ज्याय् केन्द्रित याना वनेगु खःसा अझ नं छुं स्यंगु मदुनि। अथे नं थौंया अवस्थाय् राज्य पुनर्संरचनायात १४ गू राज्यय् ब्वथलाः नमूनाया रुपय् क्षेत्रीय डिजाइन दये हे धुंकूगु दु। उकी मगाःमचाः व मछिंगुयात भिंकाः जक न्ह्यब्वःसां गायेधुंकूगु दु। थुकियात बांलाक व्यवस्थित यायेत क्षेत्र निर्धारित यानाः पास याये धुनेवं उकी दुने दयेमाःगु राज्य व्यवस्थाय् नेपाःया भू-बनोट, धर्म, संस्कृति व जातित्वयात ल्वःकथंया व्यवस्था जक बुलुहुँ याना वंसां जिउ। थःथःगु क्षेत्र दुने थःथःपिंसं हे विकास याना वनेछिनी कथंया व्यवस्था जुइबलय् सरकारयात केन्द्रय् बोझ नं म्हो जुइ। सकलें जातजातित विकासया ज्याय न्ह्यात धाःसा देश याकनं विकास जुइ ।

"लोकतान्त्रिक संघीय गणतन्त्र" या संविधान दयेकेगु ज्याय न्ह्यानाच्वंपिं सभासदपिं संविधान च्वयेगु खँय् ध्यान बीगु सिबें थःथःगु पार्टीया हितया ज्याखँय् जक अप्वः ध्यान बियाच्वंगु खने दत। वर्तमान संविधानया मू मर्मयात त्वःताः मेमेगु खँय् व थःपिंत ज्याछिंगु खँय् जक ज्या न्ह्याकाच्वंसा इलय् संविधान पिकाये फइ मखु। इलय् संविधान पिहां मवल धाःसा देश मेमेगु हे दुर्घटनाय् लाः वनेफु। वर्तमान संविधानया मू विशेषता धइगु हे संघीयता खः। थुकिं हे नेपाःयात न्हापा स्वयां बिस्कंगु संवैधानिक ख्वाःपाः चित्रित याना बी। अथे मयायेगु खःसा थ्व संविधान न्हूगु थलय् पुलांगु अय्लाः थें जुया बी गुकिं निमुखा जनजातियात छुं नं न्हूगु सवाः बी फइ मखु। न्हापाया संविधान बहुदलीय प्रजातान्त्रिक खःसां राज्य व्यवस्थाय् दयाच्वंगु केन्द्रीयकरणं यानाः राजस्व फुक्कं केन्द्रय् वनीगु, केन्द्रं हे माःकथं इना बीगु जुयाः पहुँच मदुगु थासय् बजेट मवनाः विकासया ज्या जुइ फयाच्वंगु मदु। थ्व हे खँयात ध्यानय् तया जनतां संघीय गणतन्त्रया चाहना याःगु खः। आः नं संघीयताया मर्मयात न्हुयाः न्ह्यायेगु खःसा थुकिं नेपाःया ख्वाःपाः हिले फइ मखु। संघीयता बिनाया गणतान्त्रिक संविधान न्हापाया बहुदलीय संविधान थें हे जक जुइ। उकिं यदि नेपाःयात न्हूगु कथंया संविधान बीगु खःसा थुगु संविधानय् राज्य पुनर्संरचनायात तःधंगु महत्व बीमाः। मखुसा थुकिं हाकनं मेगु जनजातिया आन्दोलन न्ह्याकेत तिबः बी। गुकि यानाः देश हाकनं अशान्तिया लँपुइ न्ह्याः वनी ।

http://www.nepalmandal.com/content/12596.html

परिषद् न्हापांखुसी बाखं गोष्ठि

Posted on Sun Feb 6, 2011 9:47 pm NST

Share 

येँ (सन्ध्या टाइम्स)/नेपालभाषा परिषद्या ग्वसालय् थौं न्हापांखुसी बाखं ज्यासः सहलह मुँज्या जुल। परिषद्या थःगु हे छेँ न्यत तुंछेँगल्लिइ जूगु मुँज्या परिषद्या नायः फणिन्द्ररत्न वज्राचार्यया सभापतित्वय् जूगु खः ।

परिषद्या दुजः नविन चित्रकारं बाखं विधा गथे जुइमाः धइगु खँयात कयाः प्रशिक्षण बियादीगु खः। उगु मुँज्याय् मिसापिं बाखं च्वमिपिंत विशेष महत्व बियाः स्तरीय बाखं च्वमिंपिं उत्पादन यायेमाःगु खँय् सहभागितय्सं बिचाः प्वंकादीगु खः।
मुँज्याय् नेपालभाषाया न्हूपिं व पुलांपिं बाखं च्वमिपिं यानाः स्वीम्हं स्वयां अप्वः च्वमिपिनिगु सहभागिता दुगु खः ।

http://www.nepalmandal.com/content/12600.html

परिषद्या छेँय् बाखं मुँज्या

Posted on Sun Feb 6, 2011 9:45 pm NST

Share 

नेपालभाषाया ज्वः मदुम्ह साहित्यकार चित्तधर 'ह्दयं' नेपालभाषा साहित्य विकासया लागिं फ्यानादीगु छेँ। अर्थात नेपालभाषा परिषद्या ज्याकू। वंगु छुं न्हि न्ह्यः तिनि उगु छेँया जीर्णोद्धार क्वचाःगु खः। न्यत तुंछेँगल्लिइ अवस्थित उगु छेँय् जीर्णोद्धार क्वचायेवं वंगु शुक्रवाः न्हापांगु साहित्यिक ज्याझ्वः जुल - बाखं ज्यासः, सहलह मुँज्या ।

ताः ई लिपा नेपालभाषा परिषद्या थःगु हे ग्वसालय् उगु मुँज्या जूगु खः। स्वीम्हं मयाक बाखं च्वमिपनिगु सहभागिता दुगु उगु ज्याझ्वः परिषद्या नायः फणीन्द्ररत्न बज्राचार्यया सभापतित्वय् न्ह्याःगु खः। मिसा बाखं च्वमिपिंत विशेष विशेष महत्व बियाः स्तरिय बाखं च्वमि उत्पादन यायेगु हे उगु ज्याझ्वःया मू आज्जु खः ।

परिषद्या दुजः नविन चित्रकारं बाखं विधा गथे जुइमाः धइगु विषयय् बःचाहाकःगु प्रशिक्षण नं बियादीगु खः। उगु प्रशिक्षणय् वय्कलं बाखंया मूखँ गथे जुइमाः, बाखंया न्हूधाः गुकथं जुइमाः, मात्राया प्रवेश, बाखंया स्वरुप, संवाद, द्वन्द्वया प्रयोग नापं बाखं दुने नं 'फाइभ डब्लू'या फर्मूला प्रयोग जू धइगु जानकारी बियादीगु खः ।

प्रशिक्षण लिपा बाखं विधायात कयाः अन्तर्क्रियात्मक सहलह नं जूगु खः। उगु सहलह ज्याझ्वलय् बाखं च्वमिपिं तुयु पुं, समान्त, मदनसेन बज्राचार्य, हरिकृष्ण डंगोल, अगिब बनेपाली, शरद कसाः, मीना बज्राचार्य लगायतपिसं थःथःगु नुगःखँ व जिज्ञासा प्वंकादीगु खः ।

सहलह ज्याझ्वलय् बांलाःगु बाखं च्वयेगु खःसा च्वमितय्सं कर्पिनि बाखंया अध्ययन यक्व यायेमाःगु, मेमेगु भाय्या सफू च्वमिपिनिगु बांबांलाःगु बाखं सफूत ब्वनेमाःगु, बाखनय् आधुनिकता हयेमाःगु, ईयात कःघानाः बाखंचु ज्वनेमाःगु, बाखंयात अझ प्रभावकारी यायेत सैद्धान्तिक पक्षयात अप्वः बः बीमाःगु आदि खँय् चर्चा जूगु खः ।

ज्याझ्वलय् थुज्वःगु सहलह ज्याझ्वः निरन्तर रुपं न्ह्याकाः बाखं विधा नापं निबन्ध (च्वखँ), कविता लगायतया साहित्यिक बिधायात नं कःघाना वनेगु खँ ग्वसाः खलकं धाःगु दु। नापं इलय् ब्यलय् खस नेपाली भाषाया बाखं च्वमि व अंग्रेजी भाषाया च्वमिपिंनाप नं थज्याःगु हे सहलह ब्याका वनेगु खँ नं अन धाःगु दु। थुकिं यानाः निगू भाय्या बाखं साहित्य बारे तुलनात्मक अध्ययन यायेत अःपुइगु खँ अन वःगु खः ।

ज्याझ्वलय् च्वमि सौरभ शाक्यं लसकुस यानादीगु खः ।

http://www.nepalmandal.com/content/12597.html