आइएलओ १६९ सम्बन्धी नेपाः सरकारया प्रतिवेदनबारे गोष्ठी

Posted on Mon Feb 7, 2011 11:43 pm NST

Share 

राष्ट्रिय मानवअधिकार आयोगया ग्वसालय् आदिवासी अधिकार सम्बन्धी अन्तराष्ट्रिय घोषणापत्र आइएलओ १६९ सम्बन्धी नेपाः सरकारया न्हापांगु प्रतिवेदनयात कयाः छगू बिचाः गोष्ठी जुल ।

नेवाः देय् दबूया नायः नरेश ताम्रकारं नं ब्वति कयादीगु उगु गोष्ठी आयोगया दुजः राम नगिना सिंहया सभापतित्वय् जूगु खः । ज्याझ्वलय् डा मुक्ता सिंह लामां प्रतिवेदनय् दुगु सवल पक्ष व दुथ्याके माःगु पक्षया बारे कार्यपत्र न्ह्यब्वयादीगु खः ।

अथेहे ज्याझ्वलय् न्ववानादिसें देय् दबूया नायः ताम्रकारं सन् २००९ हे छ्वयेमाःगु प्रतिवेदन निदँ लिपा नं मछ्वःगु धासें आपत्ति प्वंकादिल । आइएलओ १६९ कार्यान्वयन यायेगु कार्ययोजना मन्त्रिपरिषदं दच्छि न्ह्यः निसें पारित मयासें थाकातःगु खँयात कयाः नं नायः ताम्राकारं कुंखिनादिल ।

वय्कलं आइएलओ १६९या प्रावधान कथं संविधान दयेकेगु इलय् आदिवासीत नाप सहलह यायेमाःगु जूसां संविधानसभां आः तक अज्याःगु सहलह यायेगु व सुझाव मुंकेगु संयन्त्र मदयेकूगु बारे नं आयोगया ध्यानाकर्षण याकादीगु खः ।

http://www.nepalmandal.com/content/12623.html

स्वदँ क्यन नेपालमण्डल डट कम

Posted on Mon Feb 7, 2011 11:26 pm NST

Share41

थौं श्रीपंचमि । नेपालमण्डल डम कम थौं निदँ फुनाः स्वदँ क्यंगु दु ।

निदँतकया दुने नेपाः दुने व नेपाः पिनेया आपालं ब्वनामिपिंसं थुकियात माया, मतिना यानाः बियादीगु सल्लाह, सुझाव व प्रतिकृयां झीत अझ धिसिलाक्क न्ह्याः वनेत ह:पाः ब्यूगु दु । छिकपिनिगु हे सुझाव कथं थुगु पोर्टलयात अझ सशक्त रुपं भाषिक आन्दोलनया ख्यलय् व निष्पक्ष समाचार, अडियो, भिडियो ब्लग नापं देय् दुने व देसंपिनेया गतिविधि दुथ्याकेत झी न्ह्याःवनेगु जुइ ।

निदँ दुने छिकपिंसं क्यनादीगु मतिना व सद्धभाव प्रति नेपालमण्डल पुचःपाखें कृतज्ञता प्वंकूसें वइगु दँय् नं छिकपिनिगु माया व मतिना नापं मचा:मगा: कुला: छ्याताया अपेक्षा यासें छिकपिं सकसितं आपालं आपाः सुभाय् देछासें थःगु पलाः अझ धिसिलाक्क न्ह्याका वनेगु प्रतिवद्धता प्वंकाच्वना ।

http://www.nepalmandal.com/content/12622.html

नेवाः जागरण मञ्चया भिंतुना

Posted on Mon Feb 7, 2011 11:18 pm NST

Share 

नेपालमण्डल डट कम निदँ फुना स्वदँ क्यंगु लसताय् नेवाः जागरण मञ्चं भिंतुना देछाःगु दु ।

नेवाः जागरण मञ्चया कजि सुजीव बज्राचार्यं बियादीगु भिंतुनाय् थुगु वेबसाइटं सफलतापूर्वक निदँ पूवंकूगु सकल नेवाःतय्गु निंतिं लसताया खँ जूगु खँ न्ह्यथनादीगु दु ।

भिंतुना सन्देशय् हलिमय् न्यंकया थीथी थासय् च्वनाच्वंपिं नेवाःतय्त नं छथाय् हे च्वना थें छगू हे भावनाय् माःहना तयेगु ज्या यानाच्वंगु नेपालमण्डल डटकमया ज्या अतिकं च्वछायेबहःगु माध्यम जूगु खँ न्ह्यथंगु दु ।

नेवाः भाषा, साहित्य, कला, संस्कृति व नेवाः आन्दोलनयात तिबः बीगु ज्या यानाच्वंगु थुगु वेब साइटं निरन्तर प्रगति यासें अझ आपाः तिबः बियाः न्ह्यचिलीगु आशा नं जागरण मञ्चं प्वंकूगु दु

http://www.nepalmandal.com/content/12621.html

वर्ल्ड नेवाः अर्गनाइजेशनपाखें भिंतुना

Posted on Mon Feb 7, 2011 11:14 pm NST

Share4

हलिंन्यंक च्वनाच्वंपिं नेवाःत जाना नीस्वंगु वर्ल्ड नेवाः अर्गनाइजेशन निस्वना पुचःपाखें नेपालमण्डल डटकमयात भिंतुना प्राप्त जूगु दु ।

अर्गनाइजेशन नीस्वना पुचःया नायः दयारत्न शाक्यं छ्वयादीगु भिंतुना सन्देशय् आधुनिकताया लुखाखरुइ पिहांवःगु नेपालमण्डल डटकमं निदँया दुने हे हलिमय्न्यंकया नेवाःतय्त मांदेय्या बुखँ थःगु हे भासं ब्वंका सुनां नं मयाःनिगु ज्या यानाः शंखधर सिरपाः तकं त्याकूगु ज्वःममलागु व धिसि लाःगु पलाः जूगु धासें भिंतुना बियादीगु दु ।

नेपाल संवत् ११३१ निसें ११४०या दशकयात नेवाः दशक कथं हनेगु तातुंगु वर्ल्ड नेवाः अर्गनाइजेसनया सकल दुजःपिंपाखें नेपालमण्डल स्वदँ क्यंगु लसताय् भिंतुना देछाःगु दु 

http://www.nepalmandal.com/content/12620.html 

मंकाः खल यलपाखें नेपालमण्डलयात भिंतुना

Posted on Mon Feb 7, 2011 11:10 pm NST

Share 

नेपालभाषा मंकाः खल यलपाखें नेपालमण्डल डट कम निदँ फुनाः स्वदँय् क्यंगु लसताय् भिंतुना देछाःगु दु ।

मंकाः खलया न्हूम्ह नायः किरण शाक्यं बियादीगु भिंतुनाय् संचारया न्हूगु व अत्याधुनिक माध्यमपाखें नेपालभाषाया माध्यमं नेवाः जातिया थीथी बुखँ हलिंन्यंक च्वपिं नेवाःतय् दथुइ थ्यंकेत नेवालमण्डल ताः लाःगु खँय् लसता प्वंकादीगु दु ।

नेपालभाषाया ल्याय्म्ह पत्रकारतय् कार्य कुशलता व मिहिनतया हुनिं चीहाकःगु इलय् नेपालमण्डलं थःगु तातुना कथंया ज्या सुथांलाक्क न्ह्याकूगु खँ भिंतुना पतिइ न्ह्यथनातःगु दु ।

नेवाःतय्गु समग्र विकास व नेवाः राज्य प्राप्तिया निंतिं न्ह्याकीगु हरेक पलाखय् मंकाः खलः नेपालमण्डल डटकम नाप न्ह्यवलें नापं दइगु प्रतिबद्धता नं मंकाः खलपाखें प्वंकूगु दु ।

http://www.nepalmandal.com/content/12619.html

नेवाः देय् दबू पाखें भिंतुना

POSTED ON TUE FEB 8, 2011 7:13 PM NST

Share

नेपालमण्डल डटकम निदँ फुनाः स्वदँ क्यंगु लसताय् नेवाःतय् राष्ट्रिय संगठन नेवाः देय् दबू पाखें लसता प्वंकूगु दु ।

नेवाः देय् दबूया नायः नरेश ताम्राकारं छगू भिंतुनाः सन्देश छ्वयाः नेपालमण्डलयात भिंतुना बियादीगु दु । भिंतुना पौलय् 'आःया समाचार आः हे' धइगु क्वातुगु मूवंगु भावनां अभिप्रेरित नेपालमण्डल डटं वंगु निदँ न्ह्यः निसें ज्वः मदुगु भूमिका म्हितेत ताःलाःगु खँ न्ह्यथनातःगु दु ।

नेवाः तजिलमि व नेपालभाषाया प्रचार प्रसार यायेगु, हलिमय्न्यंकया थीथी बुखँ हलिमय् कुंकुलामय् तकं थ्यंकाः सुशुचित यायेत नेपालमण्डल डटकम ताःलागु धासें देय् दबूलिं लसता प्वंकूगु दु ।

अथेहे भिंतुना सन्देशय् देय् दबूलिं नेपालमण्डल डटकलं सकल नेवाःतय्त नेवाः राजनीतिक आन्दोलनया चेताना थना नेवाः स्वायत्त राज्य प्राप्तिया आन्दोलनयात अझ सशक्त रुपं न्ह्याका वनेत बः जुयाबी धइगु भलसा काःगु दु ।

नापं हलिमय् नेवाः तजिलजि, भाषा, लिपि व थीथी बुखँया प्रचार प्रसार व सम्प्रेशन यायेगु ज्याय् सदां पला न्ह्याका च्वनेमाः धइगु भिंतुना नं ब्यूगु दु ।

http://www.nepalmandal.com/content/12627.html

अर्थपिथना प्रकाशनपाखें भिंतुना

POSTED ON TUE FEB 8, 2011 8:52 PM NST

Share

अर्थपिथना प्रकाशन प्रा. लि.पाखें नं नेपालमण्डल डटकम निदँ फुनाः स्वदँय् क्यंगु लसताय् भिंतुना देछाःगु दु ।

प्रकाशनपाखें पिहांवयाच्वंगु नेपालभाषाया ल्वकंह्वाःगु न्हिपौ सन्ध्या टाइम्सया सम्पादक सुरेश मानन्धरं छ्वयादीगु भिंतुना सन्देशय् थौंया संचार युगया थ्व इलय् इन्टरनेटया माध्यमं विश्वन्यंकया नेवाःतय्त छगू हे लसय् हयाः नेवाः एकता क्वातुकेगु ज्या यानाच्वंगु नेपालमण्डल डटकमया भूमिका च्वछ्येबहः जूगु धयादीगु दु ।

भिंतुना सन्देशय् नेवाः एकताय क्वातुकेत नेपालमण्डल डटकमं म्हिताच्वंगु भूमिका अझ धिसिलाक न्ह्याना च्वनेफेमाः धकाः मनतुना तःगु दु ।

http://www.nepalmandal.com/content/12643.html

काभ्रेय् देय् दबूया संगठन विस्तार

POSTED ON SAT FEB 5, 2011 5:52 AM NST

Share

नेवाः देय् दबूलिं थःगु संगठन विस्तार यायेगु झ्वलय् काभ्रेय् संगठन विस्तार याःगु दु । नेवाः देय् दबूया नायः नरेश ताम्राकारया उपस्थिति शुक्रवाः (सिल्लाथ्व पारु कुन्हु) काभ्रे जिल्ला संगठन निस्वंगु खः ।

शुक्रवाः काभ्रेय् जूगु छगू ज्याझ्वःया दथुइ विश्वनाथ ताम्राकारया नायःसुइ झिंन्याम्ह दुजः दुगु कार्यसमिति नं निस्वंगु दु । उगु कार्यसमितिलय् सिद्दि बहादुर कर्माचार्य छ्याञ्जे, बुधारत्न मानन्धर ल्यू छ्याञ्जे व तिकाराम भ्वाछि भ्वय् दांभरि कथं च्वनादीगु दु ।

http://www.nepalmandal.com/content/12587.html

शान्ति निर्माणया ख्यलय् जुयाच्वंपिं मय्जुपिनि गोलमेच सहलह

POSTED ON THU FEB 3, 2011 9:39 PM NST

Share

वंगु पोहेलागा चर्हे कुन्हु थनया मल्ल होटलय् Joan B. Croc Institute for Peace & Justice, San Diego University, America , Women Peace & Democracy Nepal ग्वसालय् जूगु शान्ति निर्माणया ख्यलय् जुयाच्वंपिं मय्जुपिनि छगू गोलमेच सहलह जुल ।

उगु ज्याझ्वलय् नेवाः देय् दबूया मू छ्याञ्जे मय्जु रजनी महर्जनं ब्वति कयादीगु खः । अमेरिका, श्रीलंका, फिलिपिन्सया शान्ति निर्माणया ज्याखँय् ताः इलंनिसें ज्या यानाच्वंपिं मय्जुपिंसं थःथःपिनि देशय् जुयाच्वंगु शान्ति निर्माण प्रक्रियाया अनुभव कनादीगु खः । उगु इलय् नेपाःया शान्ति निर्माण ज्याखँय् थीथी संघसंस्था पाखें झायादीपिं मय्जुपिंसं नेपालय् द्वन्द्व जुयाच्वंगु इलय् व द्वन्द्व लिपा शान्ति प्रक्रियाया विषयसं कनादीगु खःसा देय् दबूया मूछ्याञ्जे महर्जनं नेवाः देय् दबुलिं नेपाःया शान्ति प्रक्रियाय् सक्रिय भूमिका म्हिताच्वंगु खँ कनादीगु खः ।

शान्ति प्रक्रियाया दक्कले तःधंगु ज्या संविधान च्वयेगु ज्या यात नागरिकतय्त जानकारी बिइगु व जनताया राय, सुझाव मुंकाः हयेगु तथा नेवाः स्वायत्त राज्य मंकाः संर्घष समितिं स्वायत्त राज्यया निंतिं यानाच्वंगु आन्दोलनय् सक्रिय भूमिका म्हिताच्वंगु खँयात नं मू मछ्याञ्जे महर्जनं न्ह्यब्वयादीगु खः ।

अथे हे म्हिगः पोहेलागा आमै कुन्हु UNDP या छगू ज्याझ्वलय् नेपालया निंतिं श्रीलंकाया अन्तराष्ट्रिय परियोजना व्यवस्थापक रोहन सिंहसयात नेपाःया शान्ति प्रक्रिया व संविधान निर्माणया खँय् नेवाः देय् दबूलिं यानावयाच्वंगु ज्या व स्वायत्त राज्यया निंतिं झिगू घटक जानाः मंकाः कथं न्ह्याका वयाच्वंगु आन्दोलन व नेवाः देय् दबूया भूमिकाया बारे मू छ्याञ्जे मय्जुं कनादीगु खः ।

नापं ज्याझ्वलय् नेवाः देय् दबू लगायत मेमेगु आदिवासी जनजाति जाना आदिवासी अधिकार प्रत्याभूत याकेगु निंतिं गुकथंया कार्यनीति दयेके माली धैगु विषयसं सहलह जूगु खँ वय्कलं कनादीगु खः । नेवाः स्वायत्त राज्य दुने प्रान्तीय राज्यया भाषा, समावेशीकरणया सवाल, उपस्वायत्त क्षेत्रया प्रावधान व संरक्षित क्षेत्रया प्रावधान गुकथं जुयाच्वंगु दु धकाः न्यंगु न्ह्यसःलय् वय्कलं नेवाः स्वायात्त स्वायत्त राज्यया घोषणा पत्रय् दुग व राजनीतिक सम्मेलनं पारित याःगु घोषणा पत्रया आधारय् लिसः बियादीगु खः ।

http://www.nepalmandal.com/content/12565.html

नेवाः विद्यार्थी दबूया प्रशिक्षण

POSTED ON MON JAN 31, 2011 7:51 PM NST

Share9

येँ (सन्ध्या टाइम्स)/नेवाः विद्यार्थी दबूया ग्वसालय् 'संगठन संचालनया विधि व प्रक्रिया' धइगु विषयय् प्रशिक्षण ज्याझ्वः जुल। नेवाः देय् दबूया प्राविधिक ग्वाहालिइ वंगु शुक्रवाः व शनिवाः निन्हुयंकं उगु ज्याझ्वः जूगु खः ।

ज्याझ्वलय् नेवाः देय् दबूया नायः नरेश ताम्राकारं नेवाः स्वायत्त राज्य प्राप्तिया आन्दोलन व थुकी विद्यार्थीतय्गु भूमिकाया विषयय् प्रशिक्षण बियादीगु खः ।

अथे हे देय् दबूया संरक्षक लक्ष्मण राजवंशीं नेपालय् विद्यार्थी आन्दोलनया पृष्ठभूमि बारे कनादीगु खःसा मेम्ह संरक्षक मल्ल के. सुन्दरं संस्था संचालनय् वइगु थीथी कथंया हाथ्या व उकियात समाधान याना वनेगु उपाय बारे कनादीगु खः ।

लिसें देय् दबूया मू दुजः जितेन्द्र विलास वज्राचार्यं संगठन छु खः व थुकिया आवश्यकता छाय् जुइ धइगु विषयय् प्रशिक्षण बियादीगु खः। अथे हे देय् दबूया मूछ्यांज्ये रजनी महर्जनं संस्था संचालनय् नेतृत्वया भूमिका व जिम्मेवारी बारे प्रशिक्षण बियादीगु खः ।

देय्न्यंकंया नेवाः विद्यार्थीतय्त छधी व छप्पँ यानाः नेवाः कला, संस्कृति व भाषा विकासया ज्याय् न्ह्यज्यायेगु ताः तयाः नेवाः विद्यार्थी दबू नीस्वंगु खः। उकुन्हु जूगु प्रशिक्षण ज्याझ्वलय् थीथी क्याम्पस व कलेजय् ब्वनाच्वंपिं ४० म्ह नेवाः विद्यार्थीतय्सं ब्वति काःगु खः। 
ज्याझ्वःया लिपांगु चरणय् नेवाः विद्यार्थी दबूया नायः मय्जु रीसा श्रेष्ठया अध्यक्षताय् समीक्षात्मक व विस्तारित बैठक नं च्वनेगु ज्या जूगु खः ।

http://www.nepalmandal.com/content/12498.html

थीथी निर्णय यानाः क्वचाल देय् दबूया खुक्वःगु मुँज्या

POSTED ON WED JAN 26, 2011 10:15 AM NST

Share

नेवाः देय् दबूया स्वन्हुन्यंकया खुक्वःगु केन्द्रीया मुँज्यां थःपिनि संगठन सुदृढिकरण व विस्तारया थीथी ज्याझ्वः क्वःछिउगु दु ।

नेवाः देय् दबूया नायः नरेश ताम्रकारया नायःसुइ देय् दबूया ज्याकू ताम्सीपाखाय् पोहेलागा ३, ४ व ५ स्वन्हुन्यंक च्वंगु मुँज्यां न्हूगु कार्ययोजना नं पास याःगु दु । नापं उगु न्हूगु कार्ययोजना लागू यायेगु झ्वलय् थीथी जिल्लाय् मुँज्या यानाः वनेगु निंतिं बजेट नं पारित याःगु दु । मुँज्याय् देय् दबूया निम्हे हे संरक्षकपिनि सहभागीता दुगु खः । 

मुँज्यां नेवाः देय् दबूया धनकुटाय् क्वचाःगु न्याक्वःगु तःमुँज्यां मनोनीत देय् दबूया छ्याञ्जे ज्योति शाक्य व केन्द्रीय दुजः अमररत्न बज्राचार्ययात नेवाः देय् दबूया विधान-११२७ या धारा १६ (ख) कथं देय् दबूलिसें छुं नं स्वापू मदइगु कथं उमित सदस्यतां खारेज याःगु दु ।

निम्हेसिनं बारम्बार मुँज्याया निर्णययात अपहेलना याःगु, विधानया अपमान याःगु व मुँज्याय् अनुपस्थिति जुयाः विधान अःखः ज्या याःगु द्वपनय् केन्द्रीय समितिया १९ म्ह मूदुजः मध्ये १५ म्हेसिया उपस्थितिइ निष्कासन याःगु खँ नेवाः देय् दबूया नायः नरेश ताम्रकारं कनादिल । 

मुँज्यां संगठन सुदृढिकरण नापं आर्थिक, प्रशासनिक नियमाबली नं तयार याना पास याःगु दु । थ्व झ्वलय् थः नेवाः खः धइगु कथं नेवाः देय् दबूपाखें यानाच्वंगु सिफारिस याःगु बापत कयातःगु न्यासः दांपाखें बच्छि दां नेवाः देय् दबूया थःगु हे भवन दनेत कोषय् मुंकेगु नं क्वःछिउगु दु । मुँज्यां भावी कार्यायोजना व कार्य विवरणयात नं पास याःगु दु ।

http://www.nepalmandal.com/content/12443.html

मौलिक अधिकारया विषय अन्तरक्रिया

POSTED ON THU JAN 20, 2011 10:17 PM NST

Share3

पोहेंला थ्व त्रयोदशि कुन्हु संवैधानिक संवाद केन्द्र वानेश्वरया ग्वसालय् नोर्डिक (NORDIC), थीथी देय्या सभासदत व नेपाःया सभासदपिं दथुइ छगू अन्तरक्रिया ज्याझ्वः क्वचाल । उगु ज्याझ्वलय् नेवाः देय् दबूपाखें मूछ्याञ्जे रजनी महर्जनं ब्वति कया दीगु खः । 

अन्तरक्रिया ज्याझ्वलय् नर्वे, डेन्मार्क या सभासदिपं तथा यु.एन.डि.पि नर्वे या निर्देशकिपं लगायत थीथी डेलिगेटपिं झाःगु खः । नेपाः पाखें सभासदिपं राधेश्याम अधिकारी, आङदावा शेर्पा, लक्की शेर्पा, हरि फुयाल, सुरेन्द्र पाण्डे लगायतं ब्वति कयादीगु खः । 

नागरिक समाजया श्याम श्रेष्ठ, बालकृष्ण मावुहाङ व यु.एन.डि.पि पाखें कृष्ण खनाल व किथ लिस्लीपिंसं ब्वति कया दीगु । उगु ज्याझ्वलय् नेपाःया संविधान निर्माण प्रक्रियाया प्रगति विवरण पेश यायेगु तथा नर्वे व डेन्मार्क या संविधानय् अल्पसंख्यक वा भाषिक अधिकार नापं थी थी मौलिक अधिकारया विषयसं न्यनेकनै यायेगु ज्या जुगू खः ।

http://www.nepalmandal.com/content/12343.html

संवैधानिक निकाययात राय सुझाव लःल्हायेगु ज्याझ्वः

POSTED ON THU JAN 20, 2011 9:54 PM NST

Share3

पोहेंला थ्व पञ्चमि कुन्हु सहभागीतात्मक संविधान निर्माण प्रकिया(SPCAB-UNDP) या ग्वहालिइ नेवाः देय् दबू लगायत नेपाल तामाङ घेदुङ्ग, नेपाल मगर संघ, किराँत खमू यायोक्खा, नेपालकिराँत याक्थुङ चुंलुङ नापं थी थी संघसंस्था याना १८ गू नागरिक संस्थाया ग्वसालय् (SPCAB-UNDP) या परियोजनां न्याकूगु गा.वि.स.व निर्वाचन क्षत्रिय जन वकालत व नागरिक शिक्षा अभियान ज्याझ्वलय् मुंकाः हःगु राय सुझावयात छथाय् मुंकालि संवैधानिक निकायया सभापति माननिय निलम्बर आचार्ययात लःल्हायेगु ज्या क्वचाल । 

नेवाः देय् दबूया न्वकू धर्मशोभा तुलाधर व मूछ्याञ्जे रजनी महर्जनिपं लगायत थी थी मेगु संस्था उगु लिच्वः सभासद आचार्ययात उगु प्रतिवेदन लः ल्हानादीगु खः । ८६ सभासदपिंसं ब्वति कयादीगु उगु ज्याझ्वलय् सभासदत हिसिला यमि, रमेश लेखक, अनिल झापिसं उगु नागरिक शिक्षा वा राय सुझाव मुनेगु ज्या व सभासद व जनता दथुइ मुगू संवाद ज्या खः अति सह्रानीय जूगू खँ कनादीगू खः ।

http://www.nepalmandal.com/content/12342.html

राज्य पुनःसंरचना समितिइ २३ गू क्षेत्र सुचिकृत

GYAN

POSTED ON SUN JAN 23, 2011 9:30 PM NST

Share3

नेपाल कन्ष्टिच्यूशन फेडेरेशनया ग्वसालय् म्हीग छगू ज्याझ्वःयासें संविधान सभाय् राज्य पुनःसंरचना समितिइ पेश यानातःगु प्रतिवेदनय् स्वायत्त क्षेत्र, विशेष क्षेत्र व संरक्षित क्षेत्र याना २३ गू क्षेत्र सुचिकृत यानातःगु खँय् सहलह जुल । सहलह ज्याझ्वलय् मा. रामबहादुर थापा मगरं छगू कार्यपत्र नं न्ह्यब्वयादीगु खः ।

कार्यपत्रय् सभासद् मंगलसिद्धि मानन्धर, अधिवक्ता सुरेन्द्र महत्तो, प्रा. लोकराज बरालं टिप्पणी यानादीगु खः । ज्याझ्वलय् ब्वति कासें नेवाः देय् दबूया नायः नरेश ताम्राकारं स्वायत्त क्षेत्र, विशेष क्षेत्र व संरक्षित क्षेत्र धइगु मूल त आदिवासीतय्गु पहिचान जूगुलिं थुकि आदिवासीया प्रतिनिधि व पहुँच दुथ्याकेमाःगु खँय् विशेष जोड बियादीगु खः ।

http://www.nepalmandal.com/content/12415.html

नेवाः देय् दबूया खुक्वःगु मुँज्या

GYAN

POSTED ON SUN JAN 23, 2011 9:40 PM NST

Share

नेवाः देय् दबूया खुक्वःगु केन्द्रिय समितिया मुँज्या म्हिगःनिसें नेवाः देय् दबूया ज्याकुथि ताम्सिपखय् च्वंगु दु । 

पश्चिमय् जुयाच्वंगु यातायात अबरुद्धया हुनिं अनयापिं केन्द्रिय कमिटीया न्वकू विजया श्रेष्ठ व केन्द्रिय कमिटी दुजः रमेश खेँय्धौमाकु उपस्थित जुयामदीसा बाँकि १५म्हेसिनं ब्वतिकयाच्वंगु दु । 

मुँज्या कन्हय् नं न्ह्याइगु दबूया केन्द्रिय नायः नरेश ताम्राकारं नेपालमण्डलयात जानकारी बियादिल ।

http://www.nepalmandal.com/content/12416.html

ब्लग > नेवाः देय् दबू गतिविधि

विराट नेवाः महोत्सव

Tue Jan 18, 2011 6:36 am NST
झी पुचः विराटनगरया ग्वसालय् विराटनगरय् विराट नेवाः महोत्सव जुल । महोत्सवया उपप्रधानमन्त्री विजयकुमार गच्छेदारं उलेज्या यानादीगु खः । झी पुचः विराटनगरया नायः राजन श्रेष्ठया सभापतित्वय् जूगु उगु महोत्सव उलेज्या समारोहलय् ...[पूवंक]

झापाय् बाखँ मुँज्या
Tue Jan 18, 2011 6:36 am NST
नेवाः देय् दबू झापा जिल्ला समितिया ग्वसालय् झापाय् बाखं मुँज्या जुल । झापा जिल्लाया प्रमुख जिल्ला अधिकारी शशीशेखर श्रेष्ठया मूपाहांसुइ जूगु उगु ज्याझ्वलय् नेवाः देय् दबूया नायः नरेश ताम्रकार, नेवाः ... [पूवंक]

धरानय् सिद्धि नेवाः परिषदया तःमुँज्या
Tue Jan 18, 2011 6:35 am NST
सिद्धि नेवाः परिषदया झिंखुक्वःगु तःमुँज्या धरानय् क्वचाल । तःमुँज्या उलेज्या नेवाः देय् दबूया संरक्षक लक्ष्मण राजवंशीं यानादीगु खः । सरला कायस्थया सभापतित्वय् जूगु उगु तःमुँज्यां सरला कायस्थया हे नायसुइ न्हूगु ... [पूवंक]

धनकुटाय् सहलह मुँज्या
Tue Jan 18, 2011 6:35 am NST
नेवाः देय् दबू धनकुटा व नेवाः पुचः धनकुटाया मंकाः ग्वसालय् धनकुटाय् स्थानीय नेवाः संघ संस्थात नापं नेवाः देय् दबूया सहलह मुँज्या जुल । नेवाः देय् दबूया केन्द्रीय उपाध्यक्ष नवीणकिशोर शाक्यया ... [पूवंक]

इटहरीइ सहलह मुँज्या
Tue Jan 18, 2011 6:32 am NST
नेवाः पुचः इटहरीया ग्वसालय् नेवाः देय् दबूया पदाधिकारी व स्थानीय नेवाः संघ संस्थातय् दथुइ सहलह मुँज्या जुल । नेवाः पुचः इटहरिया नायः चित्रमान श्रेष्ठया सभापतित्वय् जूगु उगु सहलह मुँज्याय् मूपाहां ... [पूवंक]

उर्लाबारीइ न्हू पुचः नाप सहलह मुँज्या
Tue Jan 18, 2011 6:32 am NST
नेवाः देय् दबूया नायः नरेश ताम्रकारं उलाबारीया न्हू पुचः नाप सहलह यानादिल । न्हू पुचःया नायः चन्द्रबहादुर श्रेष्ठया सभापतित्वय् जूगु उगु सहलह मुँज्याय् नेवाः देय् दबूया संरक्षक लक्ष्मण राजवंशी, नेवाः ... [पूवंक]

विराट चोकय् प्रशिक्षण ज्याझ्वः
Tue Jan 18, 2011 6:31 am NST
नेवाः देय् दबू मोरङ जिल्ला समितिया नायः देवेन्द्र श्रेष्ठया सभापतित्वय् मोरङ जिल्ला न्यंकंया नेवाः संस्थातय् प्रतिनिधिपिंत संगठन सुदृढिकरण विषयय् प्रशिक्षण ज्याझ्वः जुल । उगु ज्याझ्वलय् नेवाः देय् दबूया नायः नरेश ... [पूवंक]

उदयपुरय् नेवाः नसा त्वंसा स्यनेज्या
Tue Jan 18, 2011 6:29 am NST
नेवाः देय् दबू उदयपुर जिल्ला समिति व नेवाः पुचः उदयपुरया मंकाः ग्वसालय् उदयपुरय् नसा न्वंसा ब्वज्या व स्यनेज्या जुल । मध्यपुर कला परिषदपाखें भाजु राम प्रजापति व मय्जुपिसं उगु तालिम ... [पूवंक]

http://www.nepalmandal.com/cat/73/1.html