Tuesday, September 28, 2010

नेवाः अधिकारया निंतिं थिमि नगरपालिकाय् नं डेलिगेशन

POSTED ON MON SEP 27, 2010 9:25 PM NST

नेवाः स्वायत्त राज्य मंकाः संघर्ष समिति मध्यपुर थिमिं थौं मध्यपुर थिमि नगरपालिकाय् थीथी माग तयाः ज्ञापनपत्र लःल्हात । नेवाः स्वायत्त राज्य मंकाः संघर्ष समितिया नायः दिलबहादुर श्रेष्ठ, संघर्ष समितिया सचिवालय कजि मल्ल के. सुन्दर, संघर्ष समितिया दुजः सुजीव बज्राचार्ययालिसें थीथी खलःपुचःया दुजःतय्गु उपस्थितिइ मध्यपुर थिमि संघर्ष समितिया नायः कृष्णलाल गोजा श्रेष्ठं नगरपालिकाया कार्यकारिणी अधिकृतयात च्यागू सूत्रीय मागसहित ज्ञापन पत्र लःल्हाःगु खः । ज्ञापनपत्र धयातःगु दु - 

"वंगु ०६२/६३ सालया शान्तिपूर्ण जनक्रान्तिया लिच्वःकथं पिदंगु अन्तरिम संविधानं नेपाःयात संघीय लोकतान्त्रिक गणतन्त्रया रुपय नाले धुंकूगु दु । राज्ययन्त्रपाखें फुक्क तगिमय् विभेदय् लाकातःपिं अतिकं ल्यूने लानाच्वंपिं जनतायात नं नीति दयेकेगु थासय् थ्यंकेत राज्य पुनर्संरचना यायेगु अले थुकथं यायेबले जातीय, भाषिक, सांस्कृतिक व भौगोलिकतायात नं बःविइगु नापं अन्तराष्ट्रिय मान्यताकथं नं आदिवासी जनजातिपिनिगु ऐतिहासिक भुमिइ इमित नीति दयेकेगु थासय् थ्यंकाः नेतृत्वया अग्राधिकार बिइमाःगु थुकथं हे नेवाःतय्गु म्हसिकाया लिधंसाय् थुगु भुमियात नेवाःतय्गु स्वायत्त राज्यया रुपय् संविधानय् हे व्यवस्था जुइ माःगु धका जुयाच्वंगु मागयात अपो पार्टीत व अधिकारीवादी संघ संस्थातसें ठिक जू धकाः धयावया च्वंगु छिस्करयात लुमंके विया च्वना ।"

अथेहे उगु ज्ञापनपत्रय् छसिकथं थुकथं च्यागू माग न्ह्यब्वःगु दु :-
१) आदिवासी नेवाः जातिया संस्कृति, चाडपर्व, जात्रा व गुथितय्गु संरक्षणया निंतिं माक्व खर्चया व्यवस्था यायेमाःगु ।
२) नगरपालिका ज्याकुथिइ आदिवासी नेवाःतय्गु थीथी व्यवहारिक व भाषिक समस्यायात तकं ध्यानय् तथा नेवाः डेस्कया व्यवस्था यायेमाःगु । 
३) आदिवासी नेवाःतय्गु सांस्कृतिक धरोहरकथंया कलात्मक सम्पदातय्गु संरक्षण व सम्बद्र्धन यायेत नगरपालिकाय् छगू कवःया व्यवस्था यायेमाःगु । 
४) नगरपालिकां पित विइगु सार्वजनिक सूचंत स्थानीय पत्रपत्रिकाय् नेपालभाषां पिथने माःगु । 
५) नगरपालिकां स्विकृति बिइगु विज्ञापनया होर्डिङ बोर्डय् नेपालभाषा छ्यल धाःसा उजोगु विज्ञापनया निंतिं ३५% व नेपालभाषा लिपि छ्यल धाःसा ६०% छ्यापं बिइ माःगु ।
६) नगरपालिका ज्याकुथिया ज्याकःमि व वडा छयाञ्जे अनिवार्य नेपालभाषा च्वयेगु व ल्हाये सःम्ह जुईमाःगु । 
७) नगरपालिकां लागु याइगु थीथी कर शुल्क ईकथं हिलाबुला यायेमाल धाःसा नेवाः स्व्यत्त राज्य मंका संघर्ष समिति मध्यपुर थिमि लागानापं सहमति दये माःगु । 
८) नगरपालिकां ज्याकःमि भर्ना काल धाःसा नेवाःतय्त प्राथमिकता बिइमाःगु । 

संघर्ष समिति थुगु मागयात छवाःया दुने पूवंकेत इनाप नं याःगु दु 

सिद्धिदासया झ्वाता दयेकेत वःगु २२ लाख ध्यबा गन तन ?

GYAN

महाकवि सिद्धिदासया झ्वाता (शालिक) दयेकेत धकाः छुं दँ न्ह्यः येँ महानगरपालिकापाखें २२ लाख तका ध्यबा वःगु खँ २७ वडाया तत्कालिक महिला नसस रत्नदेवी कसालं नेपालमण्डलयात कनादीगु दु । तर उगु ध्यबा गबले गन तन धैगु खोजीया विषय जुयाच्वंगु दु । 

येँ महानगरपालिका २७ वडाया वडाध्यक्ष बाबुराजा महर्जनया कार्यकालय् सिद्धिदासया झ्वाता दयेकेत २२ लाख तका ध्यबा निकास जुयाः थुकिया लागि पहल जूगु खः । थ्व ज्या अबले बांलाक न्ह्याये मफुत । लिपा येँ महानगरपालिकाय् पदाधिकारीत हिले धुंकाः थुकिया बारे थप छुं ज्या जुइमफुगु जक मखु दुगु बजेट नं गन गन जुइक तनावन । थुकिया बारे भाषिक कार्यकर्तात व विशेष यानाः दँय् दसं सिद्धिदास बुदिं हनेगुलिइ न्ह्यःने वयाच्वंगु नेपालभाषा मंकाः खलःपाखें पहल यानाः तथ्य लुइकेमाःगु खनेदु ।

नेवाः राज्यया निंतिं सांस्कृतिक अभियान

POSTED ON MON SEP 27, 2010 10:04 PM NST

येँ (सन्ध्या टाइम्स)/नेवाः जनसांस्कृतिक मंकाः गुथिं नेवाः स्वायत्त राज्यया निंतिं कंस १३ गते प्रज्ञाभवनया दबुली स्वनिगः सांस्कृतिक सन्ध्या याइगु जूगु दु। उगु ज्याझ्वलय् नेवाः संस्कृति व जनजीवनाप स्वाःगु नापं नेवाः मुक्तिया सः थ्वयेकीगु ब्वज्या जुइ धाःगु दु ।

सिद्धिदासया बुदिंया लसताय् नेवाः प्रदेश बारे प्रशिक्षण

POSTED ON SUN SEP 26, 2010 11:27 PM NST

सिद्धिदासया १४३ क्वःगु बुदिंया लसताय् नेपाल लोकतान्त्रिक नेवाः संघ यल कचाःपाखें नेवाः प्रदेश बारे प्रशिक्षण ज्याझ्वः यात । ज्याझ्वःलय् संघया केन्द्रीय नायः सानुराजा शाक्यं नेपालय् संघीय व्यवस्था व नेवाः प्रदेशया बारे ध्वाथुइकादीगु खः । अथेहे न्वकू हरिकृष्ण ब्याजनकारपाखें नेपाल लोकतान्त्रिक नेवाः संघया नीति व ज्याझ्वः नापं जातीय संगठनप्रति एमालेया दृष्टिकोण व केन्द्रिय दुजः नापं प्रशिक्षण विभागया कजि न्हूच्छेलाल महर्जनपाखें आइएलओ १६९ बारे दुग्यंक प्रशिक्षण बियादीगु खः ।

अथेहे नेपाल लोकतान्त्रिक नेवाः संघया संगठन विस्तारया झ्वलय् ख्वपया नंखेलय् नं गां पुचः निस्वंगु दु । नंखेलय् जूगु छगू नेवाः मुनाया दथुइ उगु गां पुचः स्वंगु खः । पुचः निस्वनेगु ज्याझ्वलय् मू पाहाँ कथं संघया केन्द्रीय नायः सानुराजा शाक्यं नेवाः प्रदेशया आवश्यकता नापं एमालेया बिचाःया बारे ध्वाथुइकादीगु खः ।

ज्याझ्वलय् संघया केन्द्रीय छ्याञ्जे कृष्णबहादुर घःजु, दुजःपिं माइलाबाबु द्यःला, महेन्द्रगोपाल श्रेष्ठ व संघया ख्वप कचाःया कजि प्रदिप शाक्यपिंसं संघया कृयाकलाप बारे खँ कनादीगु खः । नंखेलया प्रेमलाल कासुलाया सभापतित्वय् न्ह्याःगु उगु सभाय् नेकपा (एमाले) ख्वप जिल्ला कमिटीया दुजः अनिल श्रेष्ठपाखें नेवाःत न्ह्यःने वयेमाःगु खँय् बः बियादीगु खः । 

उगु मुनां प्रेमलाला कासुलायात कजि, हेरामान सुकुभटुयात छ्याञ्जे व दुजलय् न्हूच्छे बहादुर थुथाजु, केशर सुकुभटु, बावुकाजि ब्यान्जु, लक्ष्मी सुकुभटु व कल्याण सुवालयात ल्यःगु खः ।

Saturday, September 25, 2010

नेवाः संघं झौख्यलय् संगठन विस्तार

POSTED ON FRI SEP 24, 2010 9:38 PM NST

नेपाल लोकतान्त्रिक नेवाः संघं थःगु संगठन विस्तारया झ्वलय् ख्वपया झौख्य, चाँगु, दुवाकोट व छालिङ्ग गां दुथ्याःगु झौख्य लागा पुचः निस्वंगु दु । नेकपा (एमाले)या झौख्यया समन्वयलय् झौख्यया याति भैरवय् जूगु नेवाः मुनाय् संघया लागा पुचः निस्वंगु खः । संघया केन्द्रीय नायः सानुराजा शाक्य मू पाहाँसुइ न्ह्याःगु उगु भेलां झिंखुम्ह दुगु पुचः स्वंगु खः ।

पुचःया कजिलय् रामबहादुर बाखु श्रेष्ठ व छ्याञ्जे बुद्धिलाल महर्जन ल्यःगु दुसाः दुजलय् शर्मिला साखः, मंगलीमाया घुसु, शोभा बाखु, नानीछोरा गोजा, भाई प्रसाद बाटी, कृष्ण प्रसाद दथेपुथे, बाबुकाजी श्रेष्ठ, टेक बहादुर लाखजु, नर बहादुर ढुकुछुँ, रामकाजी साखः व आसबहादुर सुवाल ल्यःगु दु ।

मुनाःय् एमाले ख्वप जिल्लाया न्वकू रामबहादुर श्रेष्ठ, संघया केन्द्रीय छ्याञ्जे कृष्णबहादुर घःजु, दुजःपिं माइलाबाबु द्यःला व ज्ञानेन्द्ररत्न बज्राचार्य, संघया जिल्ला कजि प्रदिप शाक्य व दुजः झौख्य लागा इन्चार्ज इन्द्र श्रेष्ठपिसं पार्टीया दृष्टिकोण व संगठनया आवश्यकता बारे बिचाः प्वंकादीगु खः ।

थक्वातय् नं नेवाः संघ स्वन

POSTED ON FRI SEP 24, 2010 10:29 PM NST

येँ (सन्ध्या टाइम्स)/नेपाल लोकतान्त्रिक नेवाः संघ थानकोट गां पुचः नीस्वंगु दु। नेसं ११३० ञलाथ्व १४ कुन्हु थक्वातय् नेकपा (एमाले) थक्वाः पुचःया ग्वसालय् जूगु नेवाः मुनां संघया गां पुचः नीस्वंगु खः। संघया केन्द्रीय नायः सानुराजा शाक्य मू पाहां कथं झाःगु उगु ज्याझ्वः एमालेया गां कमिटीया नायः राममान गोपालीया अध्यक्षताय् जूगु खः। संघया थक्वाः पुचः राजन श्रेष्ठया अध्यक्षताय् नीस्वंगु खःसा उकिया दुजलय् राधा श्रेष्ठ, सुरेश गोपाली, दिनेश महर्जन, सुशिल प्रसाद श्रेष्ठ, सागरलाल गोपाली, सुन्दर श्रेष्ठ व रुपचन्द्र श्रेष्ठ ल्यःगु खः। संघीय व्यवस्था, नेवाः प्रदेश व नेवाः संगठनया खँय् संघया केन्द्रीय नायः सानुराजा शाक्य व येँ जिल्ला नायः सुमन श्रेष्ठं ध्वाथुइकादीगु खः ।

थुकथं हे वंगु आश्विन ८ गते शुक्रवाः ख्वपया झौखेलय्, आश्विन ९ गते ख्वपया हे नःखेलय् नेवाः संघया लागा पुचः स्वनेगु ज्याझ्वः दुगु खँ नेलोनेसंघया ख्वप जिल्ला पुचलं धाःगु दु ।

नेलोनेसंघ यल जिल्ला पुचःया ग्वसालय् यलया फुक्क नेवाः संघया मंकाः मुँज्या आश्विन ९ गते शनिवाः लगंख्यलय् जुइगु खँ नं नेलोनेसंघ यल जिल्ला पुचलं धाःगु दु। विशेष यानाः प्रस्तावित नेवाः प्रदेश व आइएलओ १६९ या बारे प्रशिक्षण बिइगु खँ संघं धाःगु दु ।

नसंचा हुलाः महाकवि महाजुया बुदिं हन

LAKASMAN

नेपालभाषाया महाकवि सिद्धिदास महजुया सच्छि व पीस्वदँ बुदिंया झ्वलय् थौं सुथय् नसंचा हुलेगु ज्या जुल । नेपालभाषा मंकाः खलः येँया ग्वसालय् जूगु नसंचा हुलेगु ज्याझ्वः थौ येँया केलत्वालय् मुनाः वंघः, मरु, न्हूघः, ब्रम्हत्वाः, ह्यूमत, भिंद्यःत्वाः, प्याफः, त्यंगः, असं जुयाः केलत्वालय् क्वचाःगु खः ।

ने.सं. ९८७ यंलागा दुतिया अर्थात थौंया दिनस केलत्वाःया क्वाछेंननी बूम्ह महाकवि सिद्धिदास महाजुं 'सत्यसति' खण्डकाब्य, न्हय्गू काण्ड पूवंगु 'सिद्धि रामायण' महाकाव्य लिसें 'सम्वाद', 'सज्जन ह्दयाभरण','शुकरम्भा संवाद' आदि यानाः बास:गुलिं मल्याक सफू च्वयाः नेपालभाषा साहित्यया धुकू जायेकादीगु खः । 

'उद्योगीया छेँस लक्ष्मी दुहांवइ' धयाः मनूतय्त कर्मशील जुइत हःपाः बियां जिल ला 'राजनीति मसिउम्ह जुजु जुइ फइमखु' धयाः राजनैतिक सन्देश बियां जिल ला 'भाषा म्वासा जाति म्वाइ' धयाः भाषिक चेतना थनां जिल ला महाजुं मदिक्क थःगु च्वसाया बलं सामाजिक भाषिक राजनैतिक चेतना थनेगु ज्याय् मदिक्क कुतः यानादीगु खः ।

ज्याझ्वःया किपाया लागि थन क्लिक यानादिसँ

थौंया दिन कवि गुरु सिद्धिदास बूगु रे

GYAN

यंलागाः दुतिया थौं नेपालभाषाया महाकवि सिद्धिदास महाजुया १४३ क्वःगु बुदिं खः । महाकवि बुदिं थीथी थासय् तःजिक हनेत्यंगु दु ।

नेपालभाषा मंकाः खलः येँ पाखें सदां थें थुगुसी नं सिद्धिदास बुदिंया लसताय् आः सुथय् नसंचा हुलेगु ज्याझ्वः तयातःगु दु । सुथय् न्याताः इलय् येँया केलत्वालय् मुनाः नसंचा हुलेगु न्ह्याइ । सिद्धिदास बुदिंया लसताय् असं दगु बहालय् कविता मुना जुइत्यंगु दुसा ख्वपय् नं कविता वाचन ज्याझ्वः जुइत्यंगु दु ।

नेपालभाषा मंकाः खलकं यानाच्वंगु नसंचा हुलेगु ज्याझ्वःलय् हालेगु जुयाच्वंगु बिहांचुलि म्ये थौंया दिनय् तसकं सान्दर्भिक तायेकाः थन न्ह्यब्वया च्वना । थुगु म्येया च्वमि दुर्गालाल खःसा थुगु म्ये बिहांचुलि लसय् हालीगु खः ।

थौंया दिन कवि गुरु सिद्धिदास बूगु रे
नेपाःमिया सरगते न्हूम्ह सूर्द्यो लूगु रे ।।धु।।

सुनसान सब्बु चान्हे नसंचा छु वल रे
खिमिलाया सिंहासने छथुं भुखाय् ब्वल रे
झीत धकाः न्यंकूगु म्ये झंगःतसें लात रे
आःतलें झीत हाय् ! न्ह्यो हे जकं सात रे

ह्याउँनिभाः लाछी वयाः झीत पियाच्वन रे
झ्याः तिना ख्युंनि धकाः झीपिं द्यनाच्वना रे
मुखूस्वानं सुखु चिनाः झीगु दसा क्यन रे
मिखा तिना: न्हाय्कं स्वयां थःत गनं खनी रे

सुथे सुतिं दायाः सितु झलमल धाः रे
सिद्धि लुमं झीगु नुगः ख्वख्वमख्व धाः रे
सिचु फसे झीसं खने सिद्धि हिहिलंगु रे
झंगलया सले च्वनाः चिल्लाय्दना क्यंगु रे

सरगते मिखा ब्वये नसंचासं दनाः रे
सिद्धिदास वः थें खने तुयू पलाः छिनाः रे
ह्याउँनिभाः झीत बियाः व जा लिहांवनी रे
झीसं नाला मकयाः व फसे तुं हे तनी रे

Friday, September 24, 2010

नेवाः प्रदेश थः हे सम्पन्न खः




POSTED ON WED SEP 22, 2010 11:20 PM NST

संविधानसभाया राज्य पुनर्संरचना व राज्य शक्तिया बाँडफाँट समितिं तयार याःगु १४ प्रदेशया अवधारणा दुनेया नेवाः प्रदेशया बारे म्हिगः छगू बिचाः गोष्ठी जुल ।

राष्ट्रसंघीय विकास कार्यक्रम, संवैधानिक संवाद केन्द्रया ग्वसालय् जूगु गोष्ठीइ राज्य पुनर्संरचना समितिया सभापति लोकेन्द्र बिष्टं नेवाः प्रदेशया समस्या व सम्भावनाया बारे चर्चा यानादिल। वय्कलं नेवाः प्रदेशया सवल पक्ष धइगु थन आपालं राजश्व संकलनया सम्भावना दुगु खःसा थुकिया नकारात्मक पक्ष धइगु पूरा प्रदेश हे ताम्सालिङ्ग प्रदेशं घेरे जुयाच्वंगु खः ।

वरिष्ठ अधिवक्ता डा. पूर्णमान शाक्यं नेवाः प्रदेशयात शहरीकरण व परम्परागत रुपं न्हयाकेमाःगु बिचाः प्वंकादिल। वय्कलं धयादिल, 'नेवाः प्रदेशयात निगू 'अति'पाखें बचे यायेमाः। छगू संस्कृति व परम्पराया नामय् पूर्ण रुपं संकीर्ण जुइ मजिउ। मेगु, आधुनिकताया नामय् मेमेगु नगर थें पूरा हाइफाई शहर नं दयेके मजिउ। थ्व छगू सिटी स्टेटया रुपय् विकास यायेमाः।' नेवाः प्रदेशय् हे देय्या राजधानी नं लाइगु जूगुलिं थ्व प्रदेशयात मेमेगु प्रदेशयात स्वयां अप्वः अधिकार बीमाःगु बिचाः नं वय्कलं प्वंकादिल ।

समितिया दुजः सभासद् डा. मंगलसिद्धि मानन्धरं नेवाः प्रदेश चीधं जूसां आर्थिक रुपं सुसम्पन्न प्रदेश खः धासें थीथी आर्थिक स्रोतया ल्याःचाः न्ह्यब्वयादिल। वय्कलं नेवाः प्रदेश दुने थौंकन्हय् हे दयेधुंकूगु स्कूल, होटल आदि थेंज्याःगु राजश्व वइगु थाय्या ल्याः अन क्यनादीगु खः ।

उगु हे समितिया मेम्ह दुजः सभासद् हितमान शाक्यं नेवाः प्रदेश दुने साधन स्रोत यक्व दुसां क्षेत्रफल स्वयां जनघनत्व अप्वः जूगु कारणं धाःसा थुकयिा हाथ्या नं थन दु धयादिल। वय्कलं नेपाः संघीय व्यवस्थाय् यदि नेवाः प्रदेश सम्भव मजूसा नेपालय् संघीयताय् हे सम्भव दइ मखु धकाः नं धयादिल ।

अथेहे नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं अन्तर्राष्ट्रिय मान्यता कथं प्रस्तावित नेवाः प्रदेशया सीमाङकंनिसें कयाः पहिचान, प्रतिनिधि, पहुँच व प्रभुसत्ताया दृष्टिकोणं नं पाय्छि मजूनि धासें उकियात सुधार यायेमानिगु बिचाः प्वंकादिल ।

उगु ज्याझ्वलय् नेवाः प्रदेश प्राप्तिया निंतिं सघर्षरत आपालं कार्यकर्तातय्सं ब्वति काःगु खः ।

http://www.nepalmandal.com/content/9867.html

चुनिखेलय् नेवाः संघ स्वन




POSTED ON WED SEP 22, 2010 11:15 PM NST

येँ (सन्ध्या टाइम्स)/नेपाल लोकतान्त्रिक नेवाः संघं थःगु संगठन विस्तारया झ्वलय् येँया चुनिखेलय् संघया गां पुचः नीस्वंगु दु। वंगु यंलाथ्व ११ कुन्हु संघया ग्वसालय् जूगु छगू नेवाः मुनाय् संघया केन्द्रीय नायः सानुराजा शाक्यं संघीय व्यवस्थाय् नेवाः प्रदेशया आवश्यकता बारे प्रशिक्षण बियादिल। उकथं हे संगठनया आवश्यकता बारे संघया येँ जिल्ला नायः सुमन श्रेष्ठं ध्वाथुइकादिल। संघया येँ जिल्ला कमिटीया दुजः व नेकपा एमाले चुनीखेल गां कमिटीया दुजः रुद्र बहादुर श्रेष्ठया संयोजकत्वय् जूगु उगु मुनां हरिशरण श्रेष्ठ नायः, रामबहादुर श्रेष्ठ न्वकु व मोतिलाल महर्जन छ्याञ्जे कथं च्वनादीगु कार्यसमिति नीस्वंगु खः। उकथं हे दुजलय् सन्तभाई श्रेष्ठ, कान्छा नगरकोटी, यचु श्रेष्ठ, श्याम श्रेष्ठ, अनिल श्रेष्ठ, रामकाजी श्रेष्ठ व प्रेम श्रेष्ठ च्वनादीगु दु ।

नेवाः संघया येँ जिल्ला कमिटीं येँया थीथी गां व नगरय् संगठन विस्तार न्ह्याकाच्वंगु दु। थ्व हे झ्वलय् थक्वाः(थानकोट)य् नं कमिटी नीस्वनेत्यंगु दु ।

नेपाल संवत् व सांस्कृतिक पर्व बारे अन्तर्किया

newanuga

राष्ट्रिय विभूति शंखधर साख्वाः प्रतिष्ठानं शुक्रवाः नेपाल संवत् व सांस्कृतिक पर्वया बारे छगू अन्तर्किया ज्याझ्वः यात । येँया नेपाल पर्यटन बोर्डया सभाकक्षय् जूगु अन्तर्कियाय् नेपाल पंचाङ्ग समितिया दुजःत, ज्योतिषत, संस्कृतिविद्, इतिसासविद् व नेपालभाषा आन्दोलनया न्ह्यलुवातय् ब्वति दुगु खः ।

ज्याझ्वलय् प्रतिष्ठानया नायः श्यामकृष्ण मानन्धरं अन्तर्किया ग्वसाःग्वयेमाःगु उदेश्याया बारे ध्वाथुइकादीगु खःसा सन्ध्या टाइम्स न्हिपौया सम्पादक सुरेश किरण मानन्धरं नेपाल संवतय् व सांस्कृतिक पर्वया बारे ज्यापौ न्ह्यब्वयादीगु खः ।

नेपाल पंचाङ्ग निर्णायक समितिया नायः डा. माधवप्रसाद भट्टराईं छुछु नखः न्यायेकीगु बारे विवाद मदुसां गुकुन्हु नखः न्याकीगु बारे विवाद वयाच्वंगु धयादिसें थुकीया बारे निरन्तर सहलह यानाः दक्वसिनं छन्हु हे नखः न्यायेकीगु कथं एकरुपता हयेमाःगु धयादिल । नेपाल पंचाङ्ग निर्णायक समितिया मंगलदास प्रधानाङ्गं नेपाल संवत् व म्हा पुजा दथुइ छुं स्वापू मदुगु तर थुकीयात स्वानाः स्वयाच्वंगुलिं समस्या वःगु धयादिल ।

इतिहासविद् त्रिरत्न मानन्धरं सूर्योदय जुइगु न्हि कथं तिथि क्वःछिना नखः हनेमाःगु धयादिल । संस्कृतिविद् सत्यमोहन जोशीं शास्त्रीय पद्धतिया थःगु महत्व दुसां अज्याःगु विषेश नियमयात सरलीकरण यानाः व्यवहारीक यायेमाःगु धयादिल ।

ज्याझ्वलय् जन बहाःया बौद्ध गुरुजु स्वयम्भुरत्न बज्राचार्य, क्वाः बहाःया गुरुजु दिकप बज्राचार्य, इतिहासविद् श्याम सुन्दर राजवंशी, नेपाल ज्योतिष परिषदया लोकराज पौडेल, नेपाल पंचाङ्ग निर्णायक समितिया सूर्यप्रसाद दुङ्गेल, नेपालभाषा मंकाः खलःया नायः पद्मरत्न तुलाधर, नेवाः देय् दबूया संरक्षक मल्ल के सुन्दर लगायतं नं थःथःगु बिचाः प्वंकादीगु खः 

मतदाता परिचयपत्रय् नेपालभाषा च्वयेत माग

newanuga

नेवाः स्वायत्त राज्य मंकाः संघर्ष समितिं मतदाता परिचयपत्रय् नेवाःतय् मां भाय्यात नेपालभाषा च्वयेत माग याःगु दु ।

संघर्ष समितिया नयाः दिलबहादुर श्रेष्ठ सहितया पुचलं बिहीवाः प्रमुख निर्वाचन आयुक्त डा. निलकण्ठ उप्रेतियात छगू ज्ञापनपौ लःल्हासें मतदाता परिचयपत्रय् नेवारी मखसें नेपालभाषा न्ह्यथनेत माग याःगु खः ।

समितिं निर्वाचन आयोगं मतदाता परिचयपत्र तयारीया निंतिं वडा स्तरय् यानाच्वंगु ज्याझ्वलय् नेवाःतय् मां भाय्यात नेवारी नामाङ्कन यानातःगु प्रति थःपिनिगु ध्यानाकषर्ण जूगु खँ धाःगु खः । ऐतिहासिकता व व्याकरणया मान्यता कथं नं नेवाः समुदायया मां भाय् नेवारी मखसें नेपालभाषा जूगुलिं मतदाता परिचय पत्र अन्तिम रुपय् तयार यायेगु इलय् नेवाःतय् मां भाय्यात नेपालभाषाया कथं भिंकेत संघर्ष समितिं इनाप याःगु दु ।

ज्ञापनपत्र लःल्हाना कयादिसें प्रमुख आयुक्त उप्रेतिं मतदाता परिचय पत्र तयार यायेगु इलय् नेवाःतय् मां भाय्यात नेपालभाषा धकाः न्ह्यथनेगु बचं बियादीगु खः ।