नेवाः स्वायत्त राज्य मंकाः संघर्ष समितिपाखें नेवाः राज्यया अभ्यास
नेवाः स्वायत्त राज्यया थःगु हे विधान
येँ (सन्ध्या टाइम्स)/नेवाः स्वायत्त राज्यया निंतिं आन्दोलन याना वयाच्वंगु मंकाःगु मोर्चा नेवाः स्वायत्त राज्य मंकाः संघर्ष समितिं आः संघीय गणतन्त्र नेपाः दुने नेवाः स्वायत्त प्रदेशया अवधारणा कथं स्वायत्त प्रदेश सञ्चालनया अभ्यास याना वनीगु जूगु दु। उकिया नितिं माःगु अवधारणा दयेकेत अधिवक्ता अर्जुन महर्जनया नेतृत्वय् कार्यविधि निर्माण पुचः दयेकूगु दु। पुचलय् दुजः कथं न्हुच्छे महर्जन, राजभाई जकःमि, नेमसिंह नकःमि, दिलबहादुर श्रेष्ठ, नरेन्द्रभक्त हाडा व चुनदेवी महर्जन च्वनादीगु दु। नेवाः स्वायत्त प्रदेशया स्वनिगः दुनेया फुक्क नगरपालिका व गाविसय् नेवाः भाय् छ्यलाबुलाय् हयेगु निंतिं नेवाः हल्पिङ डेस्क नं चायेकेगु खँ क्वःछिउगु दु ।
अथे हे वंगु विहिवाः येँ मनपां पिकाःगु कर्मचारी भर्ना सम्बन्धि नतिजाय् छम्ह हे नेवाः दुमथ्याःगु खँय् नं आपत्ति प्वंकुसें उगु नतिजा षडयन्त्रपूर्ण जूगुलिं उकियात खारेज यायेत माग याःगु दु। उकिया लागिं कन्हय् महानगरपालिकाय् हे माग याःवनेगु निर्णय नं याःगु दु ।
संघर्ष समितिया म्हिगः च्वंगु मुँज्यां येँ जिल्लाय् न्हय्गू लागा, यल जिल्लाय् न्यागू लागा अले ख्वप जिल्लाय् प्यंगू लागाया समन्वय समिति दयेकेगु नापं माः कथं स्वनिगलं पिने नं उज्वःगु लागात दयेका वनेगु निर्णय नं याःगु दु ।
लिसें नेवाः प्रदेश सञ्चालनया निंतिं माःगु संविधानया मस्यौदा नं दयेकीगु जूगु दु। संविधान मस्यौदा दयेकेत संघर्ष समिति सचिवालयया कजि मल्ल के. सुन्दरया नेतृत्वय् छगू पुचः स्वंगु दु। उगु पुचःया दुजलय् किरण शाक्य, शम्भुराम महर्जन, पुनदेवी महर्जन, विरेन्द्रभक्त श्रेष्ठ व अर्जुन महर्जन च्वनादीगु दु ।
मुँज्यां संघर्ष समितियात अझ प्रभावकारी व व्यवस्थित याना यंकेगु निंतिं न्यागू थीथी कवःत नं दयेकूगु दु। नेवाः जागरण मञ्च व नेवाः ल्याय्म्ह न्ह्यलुवायात संचार कवःया भाला बिउगु दुसा नेवाः राष्ट्रिय मुक्ति मोर्चा, नेपाः लोकतान्त्रिक नेवाः संघ व लोकतान्त्रिक नेवाः दबूयात आर्थिक व विकास कवः, नेवाः देय् दबू व नेवाः देय् गुथि नेपालमण्डलयात प्रशिक्षण कवः, नेवाः मुक्ति मंकाः दबू, ज्यापु महागुथि व ज्यापु समाजयात सांस्कृतिक कवः अले नेवाः राष्ट्रिय मुक्ति मोर्चा, लोकतान्त्रिक नेवाः दबू व नेपाः लोकतान्त्रिक नेवाः संघयात संगठन कवःया भाला बिउगु दु।
No comments:
Post a Comment