नेपालभाषा एम.ए.परीक्षाय् दकलय् अप्वः ल्याः हयाः उत्तार्ण जूम्ह ब्वँमियात 'पीयूष पदक' व मय्जुपिं मध्येय् दकलय् अप्वः ल्याः हयादीम्ह छात्रायात बीगु 'चैन लाकौल सिरपाः' थौं छगू ज्याझ्वःया दथुइ लःल्हात । नेपालभाषा केन्द्रीय विभागया नायः प्रा. प्रेमशान्ति तुलाधरया सभाध्यक्षय् जूगु थुगु ज्याझ्वलय् मूपाहां त्रिविविया शिक्षाध्यक्ष प्रा. डा. सूर्यलाल अमात्यजुं 'पीयूष पदक' सानुराजा शाक्ययात व 'चैन लाकौल सिरपाः' मय्जु अमृता महर्जनयात लःल्हानादीगु खः ।थ्वयालिसें थुगुसी निसें मिसापिं ब्वँमिपिं मध्येय् लिउ व लियांल्यू लाःम्हेसित छसिकथं 'तारा लाकौल सिरपाः' व 'रजनी लाकौल सिरपाः' बीगु क्वःजिउ कथं मय्जु मिलन शाक्ययात 'तारा लाकौल सिरपाः' लःल्हाःगु खः । तर थुगुसी छक्वलं उतीर्ण जुयाः लियांलिउ लाःम्ह मदुगु कारणं थुगुसी 'रजनी लाकौल सिरपाः' मत्रिउगु जुल । थ्व बाहेक कुमारी प्रकाशनपाखें बद्रीलाल श्रेष्ठं सानुराजा शाक्य, अमृता महर्जन व मिलन शाक्ययात 'कुमारी पदक' लःल्हाःगु खः ।
सह प्रा. ओमकारेश्वर श्रेष्ठं लसकुस यानादीगु उगु ज्याझ्वलय् मू पाहां प्रा.डा. सूर्यलाल अमात्यजुं नेपालय् संघीय राज्य जूसां नेवाःतय्गु आदिभूमि स्वनिगःयात जातीय राज्य कथं विभाजित यायेमजिउगु व स्वनिगःयात केन्द्रीय सरकारं शासन याइगु कथं जुइमाःगु बिचाः प्वंकूसें नेपाःयात भौगोलिकया आधारं संघीय राज्य दयेकेमाःगु बिचाः प्वंकादिल । ज्याझ्वलय् संस्कृति मन्त्रालयया सह-सचिव जलकृष्ण श्रेष्ठं अनुदान कार्यविधि हयेत्यंगुलिं नेपालभाषाया संस्कृतिइ अनुसन्धान यायेगु लागि थ्व ह्वःताः जूगु व नेपालभाषा केन्द्रीय विभागयात बीगु लागि फूकथं ग्वाहालि यायेगु खँ धयादिल ।
ज्याझ्वलय् दातापाखें ई. श्रीकण्ठ लाकौल, सिरपाः त्याकादीपिं सानुराजा शाक्य, अमृता महर्जनं नं थःथःगु नुगः खँ प्वंकादिल । लुम्बिनी बौद्ध विश्व विद्यालयया रजिष्ट्रार प्रा.डा. खड्गमान श्रेष्ठया नापं आपालं नेपालभाषाया विद्वत वर्गतय्गु उपस्थिति दुगु खः ।
No comments:
Post a Comment