Sunday, October 3, 2010

थिमिइ नेवाःतय्सं आन्दोलन याइगु

[ 3-10-2010 17:36:16 ]


थिमि(सन्ध्या टाइम्स)/नेवाः स्वायत्त राज्य मंकाः संघर्ष समिति मध्यपुर थिमि लागां नेवाःतय्गु माग पूरा याकेगु नितिं कन्हय् आन्दोलन घोषणा याइगु जूगु दु।
मंकाः संघर्ष समितिया छ्याञ्जे कृष्णबहादुर घजुं 'सन्ध्या टाइम्स' लिसे खँल्हासें नेवाःतय्गु माग पूरा यायेमाः धकाः न्हय्न्हुया अल्टिमेटम बियाः नं पूरा मजूगुलिं थःपिं बाध्य जुयाः हे आन्दोलनय् कुहां वनेमाःगु खः धयादिल। आन्दोलनया ज्याझ्वः तयार यायेगु नितिं कन्हय् सुथय् मुँज्या च्वनेगु जुइ धकाः नं वय्कलं धयादीगु दु। मंकाः संघर्ष समितिं मध्यपुर थिमि नगरपालिकाय् नेवाः डेस्क संचालन यायेमाःगु, कर्मचारी भर्नाय् नेवाःतय्त प्राथमिकता बीमाःगु, नेवाः भाय् लिपि छ्यलाबुलाय् हयेमाःगु, नेवाः संस्कृतियात माःगु कथं बजेट फ्यायेमाःगु नापं थीथी कथंया च्यागू बुँदाया माग नापं ज्ञापन पौ लःल्हाःगु खः।
उगु माग पत्रयात कया वंगु शुक्रवाः नगरपालिकाय् संघर्ष समितिया प्रतिनिधि, दलीय संयन्त्रया प्रतिनिधि व नगरपालिकाया प्रतिनिधित च्वना वार्ता जूगु खः। वार्ताय् दलीय संयन्त्रयापिं अप्वः यानाः सहभागी मजूगु नापं मागयात कयाः बेवास्ता याःगुलिं मौखिक रुपं जक खँ जुयाः छुं नं ठोस खँ क्वःछी मफुगुलिं कन्हय् हे संघर्ष समितिं आन्दोलन घोषणा यायेत्यंगु खः।

No comments:

Post a Comment