बुद्ध जन्मभूमि बारे न्हूगु तथ्य लुल

POSTED ON MON JAN 31, 2011 7:53 PM NST

Share51

येँ (सन्ध्या टाइम्स)/बुद्ध भारतय् जन्म जूगु खः धकाः क्यनेगु नितिं भारतं उत्तर प्रदेशस्थित अलिगढवा लागाय् नक्कली लुम्बिनीया निर्माण यानाच्वंगु ज्या असफल जूगु दु ।

बेलायती विश्वविद्यालयपाखें याःगु अनुसन्धानय् कपिलवस्तुया तिलौराकोटय् बुद्धकालीन शहर हे पत्ता लगे जुइवं बुद्धयात थःपिनिगु देशय् जन्म जूम्ह खः धकाः भारतं यानाच्वंगु कुतः असफल जूगु खः। द्वलंद्वःदँ पुलांगु पुरातात्विक महत्वया संरचना पत्ता लगे यायेगु अत्याधुनिक प्रविधि प्रयोग यानाः जहाजपाखें याःगु एक्स-रेपाखें तिलौराकोटया जमिन तःले शहर दुगु खँ पत्ता लगे जूगु खः। बेलायती विश्वविद्यालया डरहामया विशेषज्ञं हवाईजहाजपाखें याःगु अनुसन्धानं तिलौराकोटया भूगर्भय् दरबार, ४ लेनया सतक, लँया निखे छेँया शहर, उद्यानतकं व्यवस्थित यानातःगु पुष्टि जूगु दु। लच्छि न्ह्यः जक याःगु अनुसन्धानपाखें थ्व खँ पत्ता लगे जूगु खः ।

उखे भारतं बुद्ध भारतय् जन्म जूगु खः धकाः दावी यासें उकियात पुष्टी यायेगु नापं विश्व समुदाययात भ्रमय् लाकेगु कुतः यानाः नक्कली लुम्बिनी व तिलौराकोट दयेकेगु ज्या यानाच्वंगु दु। बुद्धया जन्मस्थल बारे भ्रम ब्वलंकेगु नितिं भारतया उत्तर प्रदेशया अलिगढीवाय् धमाधम निर्माणया ज्या यानाच्वंगु दु। उगु ज्या सन् २०१२ या दुने क्वचायेकेगु लक्ष्य तयातःगु दु। नेपाःया कपिलबस्तुनाप स्वाःगु अलिमढवाय् अथे नक्कली कपिलवस्तु दयेकेगु ज्या जुयाच्वंगु खः। अन द्वलंद्वः मजदुरतय्सं न्हियान्हिथं ज्या यानाच्वंगु दु। उगु लागायात भारतं कपिलबस्तु धकाः तकं नां तयेधुंकूगु दु। भारतं नेपाःया कपिलवस्तुइ लुया वःगु गुलिखे सामान नापं खुयाः अन तयेयंकूगु खँ चर्चाय् वयेगु याः। तर आः लिपांगु अनुसन्धानपाखें भारतया उगु कुतः असफल जुइगु निश्चित जूगु दु ।

http://www.nepalmandal.com/content/12501.html

कपिलवस्तु बारे न्हू लुयावःगु तथ्य

POSTED ON TUE FEB 1, 2011 6:55 PM NST

Share

नेपाःया कपिलवस्तुइ सिद्धार्थ गौतम बुद्धया दरवार दु धइगु विषयय् आधिकारिक तथ्यत पिहां वःगु दु। आः नकतिनि छगू बेलायती अनुसन्धान पुचलं थ्व खँ पत्ता लगे याःगु जानकारी नं वःगु दु। अत्याधुनिक व वैज्ञानिक प्रविधिपाखें याःगु अनुसन्धानपाखें थ्व न्हूगु खँ पत्ता लगे जूगु खः। खतुं कपिलवस्तु हे गौतम बुद्धया गृहनगर खः धइगु खँ इतिहासं न्हापा नं पुष्टि यायेधुंकूगु खँ खः। उकी सुनां नं विवाद याःगु मदु। अथे खःसां झी हे जःलाखःला देय् भारतं धाःसा बुद्ध जन्म जूगु थाय् व च्वनीगु थाय् भारतय् लाः धकाः न्हापांनिसें दावी याना वयाच्वंगु खःसा उकियात पुष्टि यायेगु लागिं थःगु देशय् नक्कली कपिलवस्तु लागिं थःगु देशय् नक्कली कपिलवस्तु नगर हे दयेकेगु ज्या समेत याना वयाच्वंगु खः। भारतं थःगु लागाय् दयेकाच्वंगु नकली कपिलवस्तुइ गुलिखे ज्वलंत अज्याःगु नं तये हयेधुंकूगु दु गुगु नेपाःया धाथेंया कपिलवस्तुं खुया यंकातःगु खः। नेपाःया कपिलवस्तुइ उत्खनन् याःबलय् लुयावःगु आपालं ज्वलंत आः तनेधुंकूगु खँ पिहां वयाच्वंगु दु। थ्व ज्वलं गुलिखे नेपाःपाखें बांलाक सुरक्षित याना मतःगु कारणं खुयाः उखे यंकूगु खःसा गुलिखे अनया हे भ्रष्ट कर्मचारीतय्सं ध्यबा नयाः बिया छ्वःगु धइगु खँ नं पिहां वयाच्वंगु दु। नेपाःया धाथेंया कपिलवस्तुया हे ज्वलंत खुयाः थःथाय् मुंकूगु कारणं यानाः भारतं सकली कपिलवस्तु थःगु देशय् लाः धकाः दावी याःगु खः। 
न्ह्यागुसां आः लुया वःगु न्हूगु तथ्यं न्हापा हे प्रमाणित जुयाच्वने धुंकूगु सत्ययात हानं छक्वः पुष्टि यायेगु ज्या याःगु दु। थुकिं विश्वयात छगू हे बांलाःगु हे सन्देश वनीगु आशा यायेछिं ।

http://www.nepalmandal.com/content/12511.html