तालावन्दी याःवंपिं १७म्हेसित ज्वन, २५ जवान घाःपाः
newanuga
Posted on Wed Jul 21, 2010 4:33 pm NSTShare22नेवाः स्वायत्त राज्य मंकाः संघर्ष समितिया आह्वानय् येँ महानगरपालिकाया ३५गूलिं वडाय् बुधवाः तालाबन्दी यायेगु झ्वलय् १३म्हेसित प्रहरीं ज्वनायंकूगु दुसाः प्रहरी नाप जूगु मुठभेडय् २५ जवान घाःपाः जूगु दु ।
येँ महानगरपालिका नगरपरिषदं गैरसमावेशीय तरीकां थीथी पदय् यायेत्यंगु कर्मचारी नियुक्ति प्रक्रिया रद्द यायेमाःगु माग यासें बुधवाः सुथय् महानगरपालिका अन्तर्गत दक्वं वडाय् अनिश्चितकालिन तालावन्दी यायेगु झवलय् वडा नं १० पाखें वोध राज श्रेष्ठ, मन्दिरा तण्डुकार, सानुकाजी महर्जन व राजकुमार श्रेष्ठयात ज्वनायंकूगु दुसाः वडा नं ३४ पाखें कृष्णभक्त मानन्धर, राजन किराती, रोहित, दुर्गा श्रेष्ठ, लक्ष्मण जोशी, दिलबहादुर श्रेष्ठ, निशान, इन्द्रबहादुर लामा नापं १३म्हेसित प्रहरीं ज्वनायंकूगु दु ।
अथेहे तालावन्दीया झ्वलय् वडा नं १७ धोबीचौरय् तालं ग्व वंपिंत प्रहरीं लाठीचार्ज याःगु दु । लाठीचार्जय् लानाः अमररत्न बज्राचार्य, चिनियाँमान बज्राचार्य, नरेशवीर शाक्य, डा. महेशमान श्रेष्ठ, रत्नदेवी कसाः, शोभा बज्राचार्य, शिलरत्न स्थापित, राजेन्द्र श्रेष्ठ, चाँद शाही, सुवर्ण कृष्ण मानन्धर, बुद्ध सिंह, ज्योति मानन्धर, रेणु शाक्य, शैलेस श्रेष्ठ, रामदेवी महर्जन, महेश्वरलाल श्रेष्ठ, नविन श्रेष्ठ, ध्रुव केसी, विनोद महर्जन, नारायण महर्जन, पुण्यराज शाक्य, सानु धोबी, रिना पोडेनी, सागरी श्रेष्ठ, ध्रुब थापा व महेश नेवाः घाःपाः जूगु दु ।
अन छुं ई प्रहरी व आन्दोलनकारी दथुइ अप्पां क्येकाः ल्वापु जूगु खः । प्रहरी हस्तक्षेपया विरोधय् संघर्ष समितिं उगु हे वडा केन्द्रीत विरोध जुलुस आमसभा व धर्ना नं याःगु दु ।
अथेहे संघर्ष समितिं प्रहरी हस्तक्षेप विरुद्ध थौं सनिलय् ६:३० बजे असनं मशाल जुलुस पिकायेत्यंगु दु ।
http://www.nepalmandal.com/content/9083.html
No comments:
Post a Comment