नेवाः कार्यकर्तायात लाठीचार्ज
Posted on Wed Jul 21, 2010 11:54 pm NSTShare येँ (सन्ध्या टाइम्स)/नेवाः स्वायत्त राज्य मंकाः संघर्ष समितिया आह्वानय् नेवाःतय्सं थौं येँ मनपाया स्वीन्यागुलिं हे वडा ज्याकुथी तालं ग्वया बिउगु दुसा छुं छुं वडाय् प्रहरीं हस्तक्षेप यानाः आपालं कार्यकर्तायात घाःपाः यायेगु नापं ज्वना नं यंकूगु दु ।
तालं ग्वयेगु झ्वलय् वडा नं. १७ य् प्रहरीलिसे ल्वापु जूगु दु। उकी प्रहरीं अन्धाधुन्द याःगु लाठीचार्जय् लानाः अमररत्न बज्राचार्य, शोभा बज्राचार्य, दशनारायण महर्जन, डा. महेशमान श्रेष्ठ, नरेशवीर शाक्य, रिना पोडेनी, रामदेवी महर्जन, महेश्वरलाल श्रेष्ठ, नविन श्रेष्ठ, धुरब केसी, विनोद महर्जन, सागरी श्रेष्ठ, रत्नदेवी कसाः, सानु धोबी, ज्योती मानन्धर, रेनु शाक्य, सैलेश श्रेष्ठ, नारायण महर्जन, पुण्यराज शाक्य, सिलरत्न स्थापित, राजेन्द्र श्रेष्ठ, बुधसिंह, चिनियामान बज्राचार्य आदि घाःपाः जूगु दु । बुध सिंहया ल्हाः त्वःधूगु दुसा सुवर्ण कृष्ण मानन्धर, शोभा बज्राचार्य व अमर बज्राचार्ययात वीर अस्पतालय् वासः याके यंकूगु दु ।
अथे हे प्रहरीं १० नं. वडा लागां बोधराज श्रेष्ठ, सानुकाजी महर्जन, मन्दिरा तण्डुकार, राजकुमार व वडा नं. ३४ लागां कृष्णभक्त मानन्धर, लक्ष्मण जोशी, राजन किसाती, रोहीत, दुर्गा श्रेष्ठ, निसान, दिल बहादुर श्रेष्ठ व इन्द्रबहादुर लामायात ज्वंगु दु ।
नेवाः स्वायत्त राज्यया अवधारणा कथं मनपाय् ज्या यायेमाःगु मू खँ ज्वनाः मनपाय् कर्मचारी भर्नाया गुगु कथं प्रक्रिया शुरु यात उकियात रद्द यायेमाःगु माग तयाः आन्दोलन याःगु खः। वहे आन्दोलनया झ्वलय् थौं येँ मनपाया फुक्कं वडाय् तालं ग्वयेगु ज्या जूगु खः ।
तालं ग्वयेगु झ्वलय् मेमेगु वडाय् धाःसा शान्तिपूर्ण रुपं तालं ग्वःगु खः। थौं तालं ग्वयेगु ज्या दुगुलिं फुक्क धइथें वडाय् प्रहरी पाः तयातःगु खःसां उमिसं सुयातं छुं धाःया मयाः ।
http://www.nepalmandal.com/content/9094.html
No comments:
Post a Comment