http://www.nepalmandal.com/content/9227.html
Posted on Sun Aug 1, 2010 10:18 pm NSTShare
येँ प्रकाशमानया कब्जाय्
येँ (सन्ध्या टाइम्स)/नेपाली कांग्रेसया झिंनिक्वःगु महाधिवेशनय् भोट कुर्कीपिं प्रतिनिधित ल्यइगु चुनावय् येँ जिल्लायात कांग्रेस उप सभापति प्रकाशमान सिंहं थःगु कब्जाय् काःगु दु ।
येँ जिल्लाया म्हिगः जूगु चुनावया लिच्वः कथं फुक्क हे धइथें वडाय् प्रकाशमान पक्षधरत त्याना वःगु दु। येँ निर्वाचन क्षेत्र नं. १ य् हिरालाल तण्डुकार, २ लय् उपेन्द्र कार्की, ३ य् चक्रबहादुर थकुरी, ४ य् न्हुच्छे नारायण श्रेष्ठ, ५ य् रमेश खडका, ६ लय् न्हुच्छे नारायण मानन्धर, ८ य् मोहन बस्नेत, ९ लय् धर्मराज गौतम व १० य् राजकुमार नकर्मीया नेतृत्वय् दुगु प्यानल त्याना वःगु खः ।
नेवाः स्वायत्त राज्य मंकाः संघर्ष समितिइ दुथ्याःगु नेवाः लोकतान्त्रिक दबूया नायः गजेन्द्र मानन्धरं थुगुसीया चुनावय् नेवाः आन्दोलनय् सक्रिय जूपिं फुक्क हे कार्यकर्तातय्त बुका बिउगु नापं शारीरिक बलया लिधंसाय् चुनाव त्याकः वःगु खँ स्वीकार यानादीगु दु ।
ख्वपय् स्थगित
क्रियाशील दुजःया बारे विवाद जूगुलिं कांग्रेसया ख्वप जिल्लाया निगुलिं हे निर्वाचन क्षेत्रया चुनाव स्थगित जूगु दु। क्रियाशील दुजःया विवाद क्वःछीगु निंतिं थौं केन्द्रीय ज्याकुथी नां धलः छ्वइगु खँ कांग्रेस ख्वप जिल्ला कमिटीं धाःगु दु ।
तिर्थराम व गजेन्द्र नं बुत
म्हिगः जूगु अधिवेशनय् येँया फुक्क धइथें निर्वाचन क्षेत्रय् नेवाः आन्दोलनया पक्षधर कार्यकर्तात बूगु दु। वडा नम्बर १० या महाधिवेशन प्रतिनिधि ल्ययेगु चुनावय् सांसद तिर्थराम डंगोल पराजित जूगु दु। अथे हे नेवाः आन्दोलनया न्ह्यलुवा कथं न्ह्यःने वयाच्वंम्ह नेवाः लोकतान्त्रिक दबूया दुजः वीरेन्द्र भक्त श्रेष्ठ नं पराजित जूगु दु ।
अथे हे किपुली नेवाः आन्दोलनय् क्रियाशील जुयाच्वंपिं कांग्रेस कार्यकर्तात हरिशरण महर्जन व राममान सिंह नं कांग्रेस चुनावय् पराजित जूगु दु। भिमसेनदास प्रधान व नविन चित्रकार धाःसा त्याःगु दु ।
No comments:
Post a Comment